मौलिक संस्कृति र पर्यटन प्रवर्द्धनका लागि चौखाबाङमा कुप्रेकोट मेला आयोजना

रुकुम पश्चिमको मुसिकोट नगरपालिका–९, चौखाबाङमा ऐतिहासिक तथा परम्परागत कुप्रेकोट मेला कात्तिक ३० गतेदेखि मंसिर २ गतेसम्म सञ्चालन हुने भएको छ।

स्थानीय एकता समाज नेपालको आयोजनामा हुने मेलाको नारा ‘स्थानीय कुप्रेकोट मेला जाऔँ: विविध खेलकुद तथा सांस्कृतिक कार्यक्रमसँगै रमाऔँ’ रहेको छ। मेलामा पुरुष भलिबल, अनलाइन वक्तृत्वकला, लोकदोहोरी, एकल नृत्य, घैँटो फोर र बेलुन फुटाउनेलगायत प्रतियोगिता सञ्चालन हुनेछन्।

आयोजकले मुसिकोट खलङ्गामा बिहीबार पत्रकार सम्मेलनको आयोजना गर्दै कार्तिक ३० गतेदेखि मंसिर २ गतेसम्म मेला लाग्ने जानकारी गराएको छ । पुरुष भलिबल प्रतियोगितामा प्रथम, द्वितीय र तृतीय हुने टोलीले क्रमशः ४० हजार, २५ हजार र १५ हजार रुपैयाँ पुरस्कार प्राप्त गर्नेछन्। त्यस्तै, अनलाइन वक्तृत्वकला प्रतियोगितामा प्रथम हुनेले ३ हजार, द्वितीयले २ हजार र तृतीयले १ हजार रुपैयाँ पुरस्कार पाउनेछन्। लोकदोहोरी प्रतियोगितामा क्रमशः २ हजार ५ सय, १ हजार ५ सय र १ हजार रुपैयाँ पुरस्कार प्रदान गरिनेछ।

एकल नृत्य प्रतियोगितामा प्रथम, द्वितीय र तृतीय हुनेले क्रमशः १ हजार, ८ सय र ५ सय रुपैयाँ प्राप्त गर्नेछन्। घैँटो फोर प्रतियोगिताका विजेतालाई १ हजार रुपैयाँ पुरस्कार दिइनेछ। त्यस्तै, १० वर्षमुनिका बालबालिकाका लागि सञ्चालन हुने बेलुन फुटाउने प्रतियोगितामा प्रथम, द्वितीय र तृतीय हुनेले क्रमशः ८सय, ५ सय र ३ सय रुपैयाँ पुरस्कार पाउनेछन्।

अनलाइन वक्तृत्वकला प्रतियोगिताको शीर्षक ‘मौलिक कला संस्कृतिको संरक्षणमा स्थानीय सरकारको भूमिका’ रहेको छ। देशभरका माध्यमिक तहका विद्यार्थीले सहभागिता जनाउन सक्ने गरी प्रतियोगिता अनलाइन माध्यमबाट सञ्चालन गरिनेछ। मेलामा स्थानीय विभिन्न समूहका सांस्कृतिक प्रस्तुतिसमेत रहनेछन्।

प्रतियोगितामा सहभागी हुन पुरुष भलिबलतर्फ ३ हजार, अनलाइन वक्तृत्वकलातर्फ ५ सय र लोकदोहोरीतर्फ २ सय रुपैयाँ दर्ता शुल्क तोकिएको छ। त्यस्तै, एकल नृत्य र घैँटो फोर प्रतियोगिताका लागि १ सय रुपैयाँ दर्ता शुल्क लाग्नेछ भने १० वर्षमुनिका बालबालिकाको बेलुन फुटाउने प्रतियोगिता निःशुल्क सञ्चालन गरिने आयोजकले जनाएको छ।

मेलाको उद्देश्य स्थानीय कला, संस्कृति तथा खेलकुदको संरक्षण र प्रवर्द्धन गर्दै कुप्रेकोट क्षेत्रको पर्यटन विकास गर्नु रहेको आयोजकले जनाएको छ। मेलाको उद्देश्य स्थानीय कला, संस्कृति तथा खेलकुदको संरक्षण र प्रवर्द्धन गर्दै कुप्रेकोट क्षेत्रको पर्यटन विकास गर्नु रहेको आयोजकले जनाएको छ। नयाँ संरचनाअनुसार पुरुष भलिबल प्रतियोगिता वडास्तरीय हुनेछ।

खेलाडीले खेल सुरु हुनुअघि आफ्नो परिचय खुल्ने कागजात पेस गर्नुपर्नेछ। मेलामा जुवा, तास तथा जाँडरक्सी पूर्ण रूपमा निषेध गरिएको आयोजकले स्पष्ट पारेको छ।  आयोजकले खेलाडी, विद्यार्थी, स्थानीयवासी तथा सम्पूर्ण सरोकारवालालाई मेलामा सहभागी भई सफल बनाउन सहयोग गर्न आग्रह गरेको छ।