काठमाडौँबाट 'रुकुम श्री'मा आएकी दुर्गालाई स्कुटर उपहार !

संयुक्त रुकुम यातायात प्रालिको सञ्चालन गरेको 'रुकुम श्री' यातायात सेवामा यात्रा गरेकी एक यात्रुले स्कुटर जितेकीछिन् । यातायात प्रा.लि.ले बम्पर लक्की ड्र मार्फत यात्रु दुर्गा शाहीलाई स्कुटर जित्ने यात्रुको रुपमा छनोट गरेको हो । 

संयुक्त रुकुम यातायात प्रालिका अध्यक्ष डम्बर थापाका अनुसार प्रालिले आज मुसिकोट नगरपालिका वडा नम्बर १ को बराहटाकुरामा लक्की ड्र गर्दै स्कुटर प्राप्त गर्ने यात्रु छनोट गरेको हो । गत भदौ १ गतेबाट रुकुम श्री बस सेवा सञ्चालनमा ल्याएको प्रालिले नेपाल सरकारले तोकेको आधिकारिक भाडा दरमा यात्रा गर्ने करिब १४ सय यात्रुहरूलाई लक्की ड्र मा समावेश गरेको थियो ।

जसमध्य काठमाडौँबाट रुकुम पश्चिमको यात्रा गर्नुभएकी दुर्गा शाहीले स्कुटर जित्नुभएको अध्यक्ष थापाले जनाउनुभयो । विजेता शाहीकाे ठेगाना भने खुलेकाे छैन । उहाँलाई एक हप्ताभित्रमा  टिकटका साथ प्रालिको कार्यालय मुसिकोटमा सम्पर्क गर्न अनुरोध गरिएकाे छ ।

उहाँलाई प्रदान गरिएको होन्डा कम्पनीको स्कुटरको बजार मूल्य दुई लाख ८५ हजार रुपियाँ रहेको छ । विजेताले स्कुटर कम्पनीबाट आफ्नो नाममा लिन र बिमा बापत लाग्ने रकम बाहेक अरू केही खर्च बेहोर्न नपर्ने प्रालिले जनाएको छ ।

त्यस्तै अन्य पाँच जना यात्रु एक पटकका लागि निःशुल्क यात्राका लागि छनोट भएका छन् । जसमा तिलक रावल, विनोद चन्द, प्रवेश केसी, रितेश परियार र आकाश खड्का रहेका छन् ।

उनीहरूले एक वर्षको अवधिमा रुकुम श्री बसमा एक पटक निःशुल्क यात्रा गर्न पाउने प्रालिले जनाएको छ । बक्समा रहेका कोड नम्बर मुसिकोट नगरपालिकाका प्रमुख महेन्द्र केसीले तान्नुभएको थियो ।

प्रालिका अध्यक्ष डम्बर थापाको अध्यक्षतामा भएको कार्यक्रममा मुसिकोट नगरपालिकाका प्रमुख महेन्द्र केसीको प्रमुख आतिथ्यता रहेको थियो । प्रालिकाका उपाध्यक्ष रमेश गिरीले प्रालिका बारेमा जानकारी गराउँदै लक्की ड्र कार्यक्रमको उद्देश्यका बारेमा बताउनुभएको थियो ।