कार्तिक १८ देखि मुसिकोटमा दोस्रो तिर्थ स्मृति कप हुँदै

रुकुम पश्चिमको मुसिकोट नगरपालिका–७ खालबोटमा दोस्रो तीर्थ स्मृति कप–२०८३ सञ्चालन हुने भएको छ।

श्री तीर्थ स्मृति युवा समूहको आयोजनामा स्वास्थ्यका लागि खेलकुद, राष्ट्रका लागि खेलकुद भन्ने नारासहित विभिन्न खेलकुद प्रतियोगिता तथा सांस्कृतिक कार्यक्रम आयोजना हुन लागेको हो। प्रतियोगिता २०८३ कार्तिक १८ गतेदेखि २१ गतेसम्म मुसिकोट नगरपालिका–७ खालबोटस्थित अमर स्मृति खेल मैदानमा सञ्चालन हुने आयोजकले जनाएको छ।

प्रतियोगिताअन्तर्गत साविक शुद्ध वडास्तरीय पुरुष खुला भलिबल, पुरुष रस्साकसी, महिला रस्साकसी, एकल नृत्य तथा मेटो फोड प्रतियोगिता सञ्चालन हुनेछन्। साथै सांस्कृतिक कार्यक्रमअन्तर्गत आमा समूह, पञ्चेबाजा समूह तथा मयूर नाचलाई विशेष सम्मानपत्रसहित पुरस्कारको व्यवस्था गरिएको आयोजकले जनाएको छ।

पुरुष भलिबल प्रतियोगितामा प्रथम हुने टिमले ३० हजार रुपैयाँ, द्वितीय हुने टिमले २० हजार रुपैयाँ, तृतीय हुने टिमले १० हजार रुपैयाँ र सान्त्वना हुने टिमले ४ हजार रुपैयाँ नगदसहित कप, मेडल तथा प्रमाणपत्र प्राप्त गर्नेछन्। पुरुष भलिबलतर्फ टिम दर्ता शुल्क ३ हजार रुपैयाँ तोकिएको छ। त्यस्तै, पुरुष रस्साकसी प्रतियोगितामा प्रथम, द्वितीय र तृतीय हुने समूहले क्रमशः ३ हजार ४००, २ हजार ४०० र १ हजार ४०० रुपैयाँ प्राप्त गर्नेछन्।

महिला रस्साकसी तथा एकल नृत्य प्रतियोगितामा प्रथम, द्वितीय र तृतीय हुनेले क्रमशः ३ हजार, २ हजार र १ हजार रुपैयाँ पुरस्कार प्राप्त गर्नेछन। घैटो फोड प्रतियोगिताका विजेताले १ हजार रुपैयाँ प्राप्त गर्ने आयोजकले जनाएको छ।