दोस्रो शीतल चौरजहारी कपको विधिवत उद्घाटन

रुकुम पश्चिमको चौरजहारीमा दोस्रो शीतल चौरजहारी कप, २०८३ को विधिवत रुपमा उद्घाटन भएको छ । 

चौरजहारी नगरपालिका २ स्थित रंगशालामा कर्णाली प्रदेश खेलकुद विकास परिषद्का सदस्य सचिव रविन चन्द ठकुरीले कपको उद्घाटन गर्नुभएको हो । 

शीतल चौरजहारी बी ६७ ले आयोजना गरेको उक्त प्रतियोगिता आज समुद्घाटन भएको हो भने प्रतियोगिताका औपचारिक खेलहरु भने बिहिबारबाट सञ्चालनमा आउने आयोजकले जानकारी गराएको छ। 

आयोजक संस्थाका अध्यक्ष तेज बिष्टले प्रतियोगितामा विभिन्न १० टोलीहरूको सहभागिता रहेको जानकारी दिनुभयो । प्रतियोगिताको विजेताले नगद २ लाख ३० हजार १६७ रुपैयाँसहित आकर्षक ट्रफी मेडल र प्रमाणपत्र प्राप्त गर्नेछन् भने उपविजेता हुने टोलीले नगद १ लाख ३० हजार १६७ रुपैयाँ प्राप्त गर्नेछन्। प्रतियोगिताको समापन भने कार्तिक १६ गते हुने बताईएको छ। 

फुटबल खेलको विकास, खेलाडीहरूको प्रतिभा पहिचान तथा स्थानीय खेलकुदको प्रवर्द्धन गर्ने उद्देश्यले यो कपको आयोजना गरिएको आयोजकले जनाएको छ । प्रतियोगिताले रुकुम पश्चिमसहित समग्र कर्णाली प्रदेशको फुटबल विकासमा महत्त्वपूर्ण योगदान पुर्‍याउने विश्वास रहेको आयोजकको भनाइ छ । 

प्रतियोगिता अन्तर्गत ब्याडमिन्टन प्रतियोगिता समेत आयोजना गरिएको छ ।