असोज २९ देखि सानीभेरीको घण्ठानामा वडास्तरीय पुरुष भलिबल प्रतियोगिता हुँदै

रुकुम पश्चिमको सानीभेरी गाउँपालिका –१० घण्ठानामा बृहत् शुद्ध खुल्ला वडास्तरीय पुरुष भलिबल प्रतियोगिता, २०८३ हुने भएको छ। 

खेलकुदको प्रवर्द्धनसँगै स्थानीय तथा वडास्तरीय खेलाडीहरूको प्रतिभा उजागर गर्ने उद्देश्यले प्रतियोगिता आयोजना गरिएको हो। असोज २९ गतेदेखि कार्तिक १ गतेसम्म सानिभेरी गाउँपालिका –१०, घण्ठानास्थित भलिबल खेल मैदानमा प्रतियोगिता सञ्चालन हुने र टिम दर्ता असोज २८ गते बेलुका ६ बजेसम्म गरिसक्नु पर्ने आयोजकले जनाएको छ । 

प्रतियोगितामा खेलाडीहरूको उत्साह बढाउन यसअघि घोषणा गरिएको पुरस्कार रकममा वृद्धि गरिएको आयोजकले जनाएको छ। प्रतियोगिताको प्रथम हुने टिमले १ लाख १ हजार १११, द्वितीयले ५० हजार १५१ र तृतीय हुने टिमले ३० हजार ३१ नगदसहित ट्रफी, मेडल र प्रमाणपत्र प्राप्त गर्नेछन्। द्वितीय पुरस्कार विजय ओली र तृतीय पुरस्कार सानिभेरी गाउँपालिकाका प्रमुख प्रशासकीय अधिकृत नरवीर खड्काको सौजन्यमा रहेको आयोजकले जनाएको छ।

प्रतियोगितामा देशभरका जुनसुकै वडाबाट शुद्ध वडास्तरीय टिमले सहभागिता जनाउन सक्नेछन्। एउटै वडाबाट एकभन्दा बढी टिमले समेत सहभागिता जनाउन पाउने व्यवस्था गरिएको छ। खेलाडी प्रमाणीकरणका लागि नागरिकताको प्रतिलिपि वा सम्बन्धित वडा कार्यालयको सिफारिस अनिवार्य गरिएको छ। राष्ट्रिय टिममा सहभागी भइसकेका खेलाडीलाई भने प्रतियोगितामा सहभागी हुन नदिइने आयोजकले स्पष्ट पारेको छ।

उत्कृष्ट खेलाडीहरूका लागि विभिन्न विधागत व्यक्तिगत पुरस्कारको समेत व्यवस्था गरिएको आयोजक समितिले जनाएको छ।