चण्डीदल गणमा भूतपूर्व सैनिक सम्मेलन भव्य रुपमा सम्पन्न

रुकुम पश्चिमस्थित नेपाली सेनाको चण्डीदल गणमा भूतपूर्व सैनिक सम्मेलन, २०८२ सम्पन्न भएको छ । आईतबार गणको कार्य क्षेत्र रहेको रुकुम पश्चिम र रुकुम पूर्वका भूतपूर्व सैनिकहरुको सहभागितामा सम्मेलन सम्पन्न भएको हो । 

श्री नम्वर १९ बाहिनीका सहायक बाहिनिपति अनिल उपाध्यायको प्रमुख उपस्थितिमा सम्पन्न सम्मेलनको अवसरमा भूतपूर्व सैनिक परिवारका अशक्त व्यक्तिहरुलाई सहायक सामाग्रीहरु उपलब्ध गराएको छ । 

भूतपूर्व सैनिक परिवारका अशक्त सदस्यलाई सहायक सामाग्री प्रदान

सम्मेलनमा रुकुम पूर्व र रुकुम पश्चिम जिल्ला निवासी नेपाली सेनाका १०३ जना भूतपूर्व सैनिकहरुको सहभागीता रहेको थियो । रुकुम पश्चिमका ७९ र रुकुम पूर्वका २४ जना भूतपूर्व सैनिकहरुको सहभागीता रहेको गणले जानकारी दिएकाे छ ।

सम्मेलनमा सहभागीहरुलाई उपहार स्वरुप टोपी, मखलर, झोला र मण्डी उपलब्ध गराईएको थियो । सम्मेलनमा पेन्सन बुझिरहेका नेपाली सेनाका भूतपूर्व सैनिक तथा पारिवारीक निबृत्तिभरणमा रहेका व्यक्तिहरुको सहभागिता रहेको थियो । उहाँहरुलाई भ्रमण भत्तासहित सम्मेलनबाट बिदाई गरिएको थियो । 

सम्मेलनमा सहायक वाहिनिपति अनिल उपाध्याय, चण्डीदल गणका गणपति प्रमुख सेनानी बिनिश श्रेष्ठ र भूतपूर्व सैनिकहरु बिचमा अन्तरक्रिया समेत गरिएको छ । अन्तरक्रिया कार्यक्रममा सहायक बाहिनीपति उपाध्यायले नेपाली सेनाको गौरव, विगत, वर्तमान र भूतपूर्व सैनिकहरुको योगदानको बारेमा चर्चा गर्नुभएको थियो । यसका साथै भूतपूर्व सैनिक र उहाँका परिवारका सदस्यहरुको अवस्था बारेमा जानकारी समेत लिनुभएको थियो । 

अन्तरक्रिया कार्यक्रममा सहभागी भूतपूर्व सैनिकहरुले आफूहरुले पाउने सेवा, सुविधा बारेमा जिज्ञासा राख्नका साथै नेपाली सेना र देशको रक्षाको लागि आवश्यक परेमा थप योगदान दिन तयार रहेको बताएका थिए । कार्यक्रममा विभिन्न साँस्कृतिक प्रस्तुतिहरु समेत राखिएको थियो ।

चण्डीदल गणले भूतपूर्व सैनिकहरुको सहकार्यमा विभिन्न सामाजिक गतिविधिहरुका साथै ग्रामीण क्षेत्रमा निशुल्क स्वास्थ्य शिविर गर्दै आईरहेको छ ।