रुकुम पश्चिममा सद्‍भावका लागि साझा प्रतिबद्धता

रुकुम पश्चिममा सामुहिक सद्भावका लागि साझा प्रतिबद्धता गरिएको छ । 

जिल्ला प्रशासन कार्यालयको आयोजनामा भएको कार्यक्रममा विभिन्न जातजाति, भाषा र धर्मका प्रमुख, प्रतिनिधि तथा सरोकारवाला पक्षहरूबीच सामाजिक सद्भाव, आपसी विश्वास, शान्ति सुरक्षा र सहअस्तित्व कायम राख्न सद्‍भाव बैठक बसेर सामूहिक सद्‍भाव सम्बन्धी साझा प्रतिबद्धता गरिएको हो । 

प्रमुख जिल्ला अधिकारी निशानराज गौतमले विभिन्न ६ बुँदे प्रतिबद्धता गरिएको जानकारी दिनुभयो । उहाँका अनुसार राजनीतिक, सामाजिक, धार्मिक, जातीय, भाषिक तथा अन्य विविधताका बीच पारस्परिक सम्मान, सहिष्णुता, भाइचारा र एकता कायम राख्ने र  कुनै पनि व्यक्ति, समुदाय वा समूहप्रति घृणा, द्वेष, विभेद वा वैमनस्य फैलाउने कार्य नगर्ने र हुन नदिने प्रतिबद्धता गरिएको छ । 

त्यसैगरी राजनीतिक, सामाजिक, व्यक्तिगत वा सामुदायिक असमझदारी तथा विवादलाई संवाद, छलफल, समन्वय र प्रचलित कानुनी प्रक्रियामार्फत समाधान गर्ने, उत्तेजना, धम्की, हिंसा, प्रतिशोध तथा सार्वजनिक शान्ति खल्बलिने गतिविधिबाट टाढा रहने र अरूलाई समेत संयमित रहन प्रेरित गर्ने, अपुष्ट समाचार, अफवाह, भ्रामक सूचना, घृणायुक्त अभिव्यक्ति तथा उत्तेजना फैलाउने सामग्रीको उत्पादन र प्रचारप्रसार नगर्ने, सामाजिक सञ्जाल तथा अन्य सञ्चार माध्यमको जिम्मेवार प्रयोग गर्ने र त्यस्ता गतिविधिबाट तनाव उत्पन्न हुन सक्ने अवस्था देखिएमा सम्बन्धित निकायलाई समयमै जानकारी गराउने प्रतिबद्धता पनि गरिएको छ । 

कार्यक्रममा जिल्लामा शान्ति–सुरक्षा कायम गर्न जिल्ला प्रशासन कार्यालय, सुरक्षा निकाय, स्थानीय तह तथा सम्बन्धित निकायसँग आवश्यक समन्वय र सहकार्य गर्ने, सम्भावित विवाद, तनाव वा अप्रिय घटनाको पूर्वसूचना उपलब्ध गराउने तथा कानुनविपरीतका गतिविधि रोकथाम र नियन्त्रण गर्न जिम्मेवार भूमिका निर्वाह गर्ने प्रतिबद्धता गरिएको छ भने प्रतिबद्धता पत्रमा उल्लेखित विषयहरूलाई व्यवहारमा कार्यान्वयन गर्ने, आ–आफ्नो क्षेत्र र समुदायमा सद्भाव तथा सहकार्यको सन्देश प्रवाह गर्ने सहमति गरिएको छ । 

सहभागीहरुले उल्लिखित प्रतिबद्धताहरूलाई इमानदारीपूर्वक पालना गर्दै जिल्लामा शान्ति, सद्भाव, आपसी विश्वास, सहकार्य र कानुनी शासन सुदृढ गर्न आआफ्नो तर्फबाट सक्रिय योगदान गर्ने सामूहिक प्रतिबद्धता व्यक्त गरेका हुन् । 

प्रमुख जिल्ला अधिकारी निशानराज गौतमको अध्यक्षतामा भएको बैठकमा जिल्ला समन्वय समितिका उपप्रमुख देव बहादुर बिक, मुसिकोट नगरपालिकाका नगरप्रमुख महेन्द्र केसी लगायत जिल्लास्थित सुरक्षा निकायका प्रमुखहरू, पत्रकार, राजनीतिक दल, नागरिक समाज, गैरसरकारी संस्था, उद्योग वाणिज्य संघ लगायतका प्रमुख एवम् प्रतिनिधिहरुको सहभागिता रहेको थियो  ।