रुकुम र जाजरकोटका २२ जना अपाङगता भएका व्यक्तिलाई मनोसामाजिक परामर्श तालिम 

रुकुम पश्चिमको सानीभेरी गाउँपालिका ११ की धनमाया खड्का शारीरिक रुपले अपाङगता भएका व्यक्ति हुनुहुन्छ । अपाङ्गता भएकै कारण विभिन्न मानसिक तथा मनोसामाजिक समस्या भोग्य बाध्य उहाँले यस्ता समस्याबारे खुलेर कुरा गर्ने र समाधान खोज्ने अवसर नपाएको बताउनुभएको छ । 

फेल्म नेपालको सहयोगमा परिलक्षित सस्थाले संचालन गरेको अपाङ्गता भएका व्यक्तिहरुको लागि समाबेशी शिक्षा र सशक्तिकरण परियोजना अन्तर्गत पाँच दिने मनोसामाजिक परामर्श तालिम प्राप्त गरेपछि भने खड्काले आफूले असाध्यै महत्वपूर्ण र जीवनोपयोगी ज्ञान सिकेको बताउँनुभयो ।

उहाँले मनोसामाजिक समस्या, यसको पहिचान, यस्ता समस्या भएका व्यक्तिहरुलाई सहयोग तथा परामर्श प्रदान गर्ने बिषयमा नयाँ जान्न पाएको उल्लेख गर्नुभयो । प्राप्त ज्ञान र सीपलाई आफ्नो समुदायमा रहेका अन्य अपाङ्गता भएका व्यक्तिहरुलाई सहयोग गर्न प्रयोग गर्ने प्रतिबद्धता गर्नुभएकी खड्काले अपाङगता भएका व्यक्तिलाई मनोसामाजिक परामर्श झन् आवश्यक देखिएको बताउनुभयो । 

शारीरिक रुपले अपाङगता हुनुभएका जाजरकोटको कुशे गाउँपालिका ५ का मानबहादुर बिकले अपाङ्गता भएका व्यक्तिहरूलाई शारीरिक अपाङ्गतासँगै समाजबाट हुने विभेद, अपहेलना, पारिवारिक समस्या र विभिन्न मानसिक तनावले पनि असर गरिरहेको बताउनुभयो । 

तर मनोसामाजिक परामर्शको बिषयमा प्राप्त तालिममा आफ्ना भावना व्यक्त गर्ने, अरुका समस्या सुन्ने, सकारात्मक सोच विकास गर्ने, आत्मविश्वास बढाउने तथा समस्यामा परेका व्यक्तिहरूलाई मनोसामाजिक सहयोग गर्ने तरिकाहरू सिक्न पाउँदा आफुलाई खुसी लागेको उहाँले बताउनुभयो ।

पाँच दिनको सीकाइ अत्यन्तै उपयोगी र उपलब्धिमूलक रहेकोले आफूले सिकेका कुराहरू आफ्नो समूहका सदस्यहरू तथा समुदायमा रहेका अन्य व्यक्तिहरूसँग पनि साझा गर्ने उहाँले बताउनुभयो। 

तालिममा सहभागीहरुले "अपाङ्गता भएका व्यक्तिहरु पनि सक्षम छौँ र अवसर पाएमा समाज परिवर्तनमा महत्वपूर्ण योगदान दिन सक्छौँ" भन्ने आत्मविश्वास बढेको बताएका छन् । रुकुम पश्चिमको आठबिसकोट नगरपालिका, बाँफिकोट र सानीभेरी गाउँपालिका र जाजरकोटको जुनीचाँदे र कुशे गाउँपालिकामा गठन भएका २१ वटा अपाङ्गता स्वालम्बन समुह मध्य ११ समुहका २२ जनालाई यस्तो तालिम दिईएको परिलक्षित संस्थाका फिल्ड अधिकृत राजु लामिछानेले जानकारी दिनुभयो ।

उहाँले यस चरणको तालिममा कुशे, सानीभेरी र बाँफिकोट गाउँपालिकाका ११ समहुबाट प्रतिनिधिहरु समावेश गरेर ५ दिने मनोसामाजिक परामर्श सम्बन्धी तालिम दिएको बताउनुभयो । 

तालिम समापन समारोहमा सानीभेरी गाउँपालिका सामाजिक विकास समितीका संयोजक शेरबहादुर खड्काले अपाङ्गता भएका व्याक्तिलाई दया, माया होइन अवसर दिनुपर्ने बताउनुभयो । उहाँले अपाङगता भएका व्यक्तिहरुले अवसर पाए भने समाज अनि देश परिवर्तन गर्न सक्ने बताउँनुहुँदै उच्च मनोबल र सकारात्मक सोचका साथ अघि बढ्नुपर्नेमा जोड दिनुभयो । 

तालिमको सहजीकरण वरिष्ठ मनोविद विष्णु पराजुली र सिएमसी नेपालका डिलबहादुर शाहीले गर्नुभएको थियो । उक्त तालिमको समापन संस्थाका फिल्ड परियोजना अधिकृत राजु लामिछानेले गर्नुभएको थियो ।