रुकुम पश्चिममा नेकपाका गोपाल शर्माको शानदार जीत, जनार्दन शर्मा तेस्रो

प्रतिनिधि सभा सदस्य निर्वाचन अन्तर्गत रुकुम पश्चिममा भएको निर्वाचनबाट नेपाली कम्युनिष्ट पार्टीका उम्मेदवार गोपाल शर्मा विजयी हुनुभएको छ । 

आईतबार बिहान मुख्य निर्वाचन अधिकृत दिपेन्द्र थापा मगरले शर्मालाई विजयी घोषणा गर्नुभएको हो । शर्माले २१ हजार ६०९ मत प्राप्त गर्दै विजयी हुनुभएको हो । 

उहाँका निकटतम प्रतिस्पर्धी नेपाली कांग्रेसका उम्मेदवार राजु केसीलाई ४ हजार ९४८ मतले पछि पार्दै शर्मा निर्वाचित हुनुभएको हो । कांग्रेसका उम्मेदवार केसीले १६ हजार ६६१ मत प्राप्त गर्नुभएको छ । 

यसैगरी प्रगतिशील लोकतान्त्रिक पार्टीका उम्मेदवार जनार्दन शर्मा भने १४ हजार ३४६ मत प्राप्त गर्दै तेस्रो स्थानमा सिमित हुनुभएको छ । २०६४ पछि चार पटक रुकुमबाट निर्वाचित शर्माको संसदीय यात्रामा यसपटक भने रोकिएको छ । 

राष्ट्रिय स्वतन्त्र पार्टीका उम्मेदवार मानबहादुर शाहीले चार हजार ७६ मत प्राप्त गर्नुभएको छ भने नेकपा (एमाले)का उम्मेदवार नन्दराम देवकोटालाई एक हजार ८६९ प्राप्त भएको छ । केन्द्रिय सहमति अनुसार एमालेले रुकुमपश्चिममा आफ्नो उम्मेदवारी निश्क्रिय पारेर प्रलोपाका उम्मेदवार जनार्दन शर्मालाई सघाउने सहमति भएतापनि एमाले उम्मेदवारलाई मत प्राप्त भएको हो । 

त्यसैगरी नेकपा (माओवादी) का उम्मेदवार चन्द्रबहादुर बुढाले ३६६, राष्ट्रिय प्रजातन्त्र पार्टीका गोपाल खड्काले २२८, राष्ट्रिय जनमोर्चाका सत्यनारायण श्रेष्ठले १७० र उज्यालो नेपाल पार्टीका नरेन्द्र केसीले ८४ मत प्राप्त गर्नुभएको छ । उज्यालो नेपाल पार्टीले पनि जिल्लामा प्रलोपाका उम्मेदवार जनार्दन शर्मालाई सघाउने सहमति गरेको थियो । 

मुख्य निर्वाचन अधिकृतको कार्यालयका अनुसार नेकपा (संयुक्त) का उम्मेदवार शेरबहादुर केसीले ५४, आम जनता पार्टीका उम्मेदवार प्रेमा दमाई नेपालीले ४५ र नेपाल मजदुर किसान पार्टीका उम्मेदवार धनबहादुर बिकले १५ मत प्राप्त गर्नुभएको छ । 

रुकुमपश्चिममा कुल एक लाख ६ हजार ६६० मतदाता रहेकामा ६२ हजार ९६८ मत खसेको थियो । जसमा महिला ३४ हजार ६०४ र पुरुष २८ हजार ३६४ जना रहेका छन् । कुल ५९ हजार ५२३ मत सदर हुँदा तीन हजार १६ मत बदर भएको छ ।