भूकम्प र बर्षाले मध्यपहाडीमा आएको पहिरो ढाई वर्षपछि हटाईयो

मध्यपहाडी राजमार्ग अन्तर्गत रुकुम पश्चिमको करिब ५० स्थानमा रहेको पहिरो हटाईएको छ । 

२०८० कात्तिक १७ गते जाजरकोट केन्द्रबिन्दु भएर आएको भूकम्प र वर्षाको कारण कारण विभिन्न स्थानमा खसेको पहिरो करिब ढाई वर्षपछि हटाईएको हो । सडक डिभिजन कार्यालय चौरजहारीले साना तथा ठुला गरेर जिल्ला भित्रको  ५० स्थानको पहिलो सफा गरेको जनाएको छ । 

डिभिजन कार्यालयका प्रमुख खुमबहादुर भण्डारीका अनुसार भूकम्पको कारण विभिन्न स्थानमा पहिरो जाँदा तत्कालिन अवस्थामा सडक सुचारु गर्नलाई मात्र पहिरो पन्छाईएको थियो । तत्कालिन अवस्थामा यातायातका साधनहरु सञ्चालनको लागि मात्र बाटो खोलिएतापनि वर्षाको कारण थप पहिरो गएर सडक साँघुरो बनेका थिए । डिभिजन कार्यालयले मुसीकोटको साँख देखि चौरजहारीको भेरीनदिसम्म सडकमा रहेको पहिरो हटाएर आवागमनलाई सहज बनाएको हो । 

मुसिकोट नगरपालिकाको खेताकुना, सानीभेरीको सिम्ली, गिठाकोट, चाईनाबगर, चौरजहारीको कालाखोला लगायतको स्थानमा ठुलो पहिरो थिए भने अन्य स्थानका पनि सडक छेउमा पहिरो बाँकि रहेका थिए । सबै स्थानको पहिरो हटाएर फराकिलो पारिएको छ । 

कार्यालय प्रमुख भण्डारीले सडक विभागकै जनशक्ति र उपकरणहरु प्रयोग गरेर सडक मर्मत तथा सफा गरेको जनाउनुभयो । उहाँका अनुसार कार्यालयले नियमित, पटके, आवधिक र आकस्मिक रुपमा सडक मर्मत सम्भार गर्ने गरेको छ । सर्वसाधारण तथा यात्रुहरुलाई सहज, प्रभावकारी, भरपर्दो, छिटो र छरितो सडक सुविधा दिने क्रममा उक्त कार्य गरेको डिभिजन प्रमुख भण्डारीले बताउनुभयो ।

अझैपनि ठुलो पहिरो गएका स्थानहरुमा पहिरो रोकथामको कार्य बाँकि रहेको छ । डिभिजन प्रमुख भण्डारीले सडक मर्मत तथा सफाईपछि आवागमनमा सहजता र दुर्घटना न्यनिकरण हुने विश्वास रहेको उल्लेख गर्नुभयो । 

सडक छेउका विभिन्न स्थानमा रहेको पहिरो हटेपछि यातायातका साधनहरु सञ्चालनमा सहजता आएको छ । दैनिक रुपमा चौरजहारी हुँदै खलङगा आउजाउ गर्नुहुने जिप चालक खड्कबहादर रानाले अहिले सडकको पहिरो हटाईएपछि सहज भएको बताउनुभयो ।

उहाँका अनुसार ठाउँठाउँमा बाँकि रहेको पहिरोको कारण राजमार्गमा गाडी चलाउन समस्या भईरहेको थियो । अहिले निर्वाध रुपमा गाडी चलाउन मिल्ने अवस्था रहेको र दुर्घटनाको जोखिम कम रहेको उहाँले उल्लेख गर्नुभयो ।