‘जुनियर’सँग जुध्दै जनार्दन

रुकुम पश्चिममा शान्ती प्रक्रियापछिका सबै निर्वाचनमा ‘विजयी विरासत’ बनाउनु भएका प्रगतिशिल लोकतान्त्रिक पार्टी (प्रलोपा)का नेता जनार्दन शर्मा यसपटक आफ्नै ‘जुनियर’सँग चुनावी प्रतिश्पर्धामा हुनुहुन्छ । 

आगामी प्रतिनिधीसभा सदस्य निर्वाचनमा माओवादी मूलका चारसहित ११ उम्मेदवारहरु चुनावी मैदानमा हुनुहुन्छ । विगतमा जनार्दनलाई जिताउन जसले नेतृत्व गरे उनै अहिले प्रतिश्पर्धामा छन् । २०६४ को पहिलो संविधानसभा निर्वाचन हुँदै २०७०, २०७४ र २०७९ मा भारी मतका साथ निर्वाचित जनार्दनलाई अहिले जितको अन्योलता छ । 

माओवादी युद्धकालदेखि नै प्रचण्डको सहयात्री रहनुभएका जनार्दनले प्रचण्डको साथ छाडेर प्रलोपाबाट चुनावी मैदानमा हुनुहुन्छ । सशस्त्र जनयुद्ध तथा माओवादी मूलधारको राजनीतिमा प्रचण्डको पक्षमा सतिसालझैँ उभिने जनार्दनको विपक्षमा अहिले प्रचण्डकै नेतृत्वको नेपाली कम्युनिष्ट पार्टी (नेकपा) का गोपाल शर्मा उभिनुभएको छ । गोपाल शर्मा विगतका निर्वाचनमा जनार्दन शर्माको चुनावी अभियानका कमाण्डर, गृहमन्त्री हुँदाका स्वकिय सचिव, कर्णाली प्रदेश सरकारका पूर्व आर्थिक मामिला तथा योजना मन्त्री हुनुहुन्छ । 

जिल्लाका ७३ वटै वडामा बलियो पार्टी संरचना निर्माण गरेर चुनावी अभियान तिब्र पार्नुभएका गोपाल शर्माले रुकुममा कम्युनिष्ट आन्दोलन र विरासत जोगाउन सफल हुने दाबी गर्नुभएको छ । जनार्दनसँग गोपाल शर्मासहित माओवादी मूलका अन्य तीन जना पनि चुनावी मैदान उत्रिनुभएको ।

नेपाल कम्युनिष्ट पार्टी (माओवादी)बाट चन्द्रबहादुर बुढा र राष्ट्रिय स्वतन्त्र पार्टीबाट मानबहादुर शाही उम्मेदवार हुनुहुन्छ । शाही माओवादी केन्द्रको रुकुम काठमाडौं सम्पर्क समिति र अघिल्लो प्रदेशसभा निर्वाचनमा माओवादीलाई जिताउन सक्रिय भूमिका निर्वाह गर्ने युवा नेता हुनुहुन्छ । 

पुरानो पार्टी नयाँ उम्मेदवार

पुरानो पार्टी मानिने नेपाली कांग्रेसले युवा नेता राजु केसीलाई चुनावमा उतारेको छ । जेनजी आन्दोलनको मर्म, पुस्तान्तरणको माग र उच्च व्यवसायीक छविको कारण केसीले जित्ने आँकलन कांग्रेसजनमा छ । माओवादीको मत विभाजन, प्रलोपासँगको चुनावी गठबन्धनमा असन्तुष्ट एमाले कार्यकर्ताको मत समेत थपेर आफू विजयी हुने दाउमा राजु केसी हुनुहुन्छ । जिल्ला पार्टीबाट उम्मेदवार सिफारिस नभएपनि केसीले टिकट ल्याएपछि कांग्रेसको एक टोली रुष्ट रहेकोले आफ्नै पार्टी मिलाउन कांग्रेसमा हम्मे परेको छ । 

विगतको मत आँकडा
२०७९ सालको प्रतिनिधीसभा सदस्य निर्वाचनमा नेकपा (माओवादी केन्द्र), नेपाल समाजवादी पार्टी र नेपाली कांगेस बिचको गठबन्धनबाट साझा उम्मेदवार रहनुभएका जनार्दनले ३९ हजार ५४९ मत ल्याएर विजयी हुनुभएको थियो । एक्लै निर्वाचनमा होमिनुभएका नेकपा (एमाले)का उम्मेदवार नन्दराम देवकोटाले १२ हजार ९६१ मत प्राप्त गर्नुभएको थियो ।

समानुपातिकतर्फ माओवादी केन्द्र र नेपाल समाजवादीको पार्टीको एकल चुनाव चिन्हको मत ३४ हजार ३४७, नेकपा एमालेको आठ हजार ७६९ र नेपाली कांगेसको आठ हजार ७६६ रहेको छ । त्यस्तै रास्वपाको एक हजार ८६६ र एकिकृत समाजवादीको एक हजार ५१० रहेको थियो । 

एमालेको साथले हौसला

एमालेले आफ्ना उम्मेदवार नन्दराम देवकोटाको उम्मेदवारी निष्क्रिय बनाएर शर्मालाई सघाउने आधिकारिक निर्णय गरेपछि देवकोटाकै नेतृत्वमा ५५५ सदस्यीय चुनाव परिचालन कमिटी गठन भएको छ । जसले प्रलोपामा हौसला थपेको छ । एमालेको मतले जनार्दनलाई राहत हुने देखिएतापनि एमालेभित्र एकता भने देखिएको छैन । विगतमा आफैसँग रहेका कार्यकर्ताले कति साथ दिन्छन् भन्ने कुराले जर्नादनको जित वा हार मापन गर्नेछ । यसमा रास्वपालगायत नयाँ दलप्रतिको लहरले समेत प्रभाव पार्ने देखिन्छ ।

पुराना दलभित्रको बेमेल, विभाजन, चुनावी गठबन्धन, अलग चुनाव चिन्ह देखि नयाँ दलप्रतिको आकर्षणको कारण यस पटकको निर्वाचनमा कुन दल र उम्मेदवारले जीत हाँसिल गर्छ भनेर सजिलै आँकलन गर्न कठिन छ ।