यी हुन् प्रचण्डसँग चुनाव लड्ने रुकुम पुर्वका उम्मेदवार

पूर्व प्रधानमन्त्री एवम् नेपाली कम्युनिष्ट पार्टीका संयोजक पुष्प कमल दाहाल सोमबार बेलुका रुकुम पूर्वको रुकुमकोट पुग्नु भएको छ । 

आगामी फागुन २१ गते हुने प्रतिनिधिसभाको निर्वाचनका लागि मनोनयन दर्ता गर्न आज प्रचण्ड यहाँ पुग्नुभएको  पार्टीका जिल्ला ईन्चार्ज तेजबहादुर ओलीले जानकारी दिनुभयो । संयोजक प्रचण्डले भोलि मङ्गलबार उम्मेदवारी दर्ता गरेर बुधबार काठमाडौँ फर्कने कार्यक्रम रहेको बताईएको छ । 

प्रचण्डसँग चुनाव लड्न नेपाली कांग्रेस, नेकपा (एमाले), प्रगतिशिल लोकतान्त्रिक पार्टीले पनि आफ्ना उम्मेदवार अघि सारेका छन् ।  

नेकपा एमालेले पार्टीका निवर्तमान जिल्ला अध्यक्ष तथा केन्द्रीय सदस्य लीलामणि गौतमलाई उम्मेदवार बनाउने भएको छ । गौतम पार्टीको महाधिवेशनमा ४० वर्ष कम उमेरबाट प्रतिनिधित्व गर्दै केन्द्रीय सदस्य बनेपछि जिल्ला अध्यक्ष छोड्नु भएको थियो ।

नेपाली कांग्रेसले कुसुमदेवी थापा मगरलाई उम्मेदवार बनाउने निर्णय गरेको छ । उहाँ यसअघि समानुपातिक कोटाबाट प्रतिनिधि सभा सदस्य हुनुहुन्थ्यो । 

यसैगरी प्रगतिशील लोकतान्त्रिक पार्टीबाट सन्दिप पुन उम्मेदवार रहनुभएको छ । उहाँ जनयुद्धका शहीद पुत्र हुनुहुन्छ । राष्ट्रिय स्वतन्त्र पार्टी (रास्वपा) का जिल्ला सभापति लखन  स्वारले पनि उम्मेदवारी दिनुहुने बताईएको छ । 

०६४ देखि नै तत्कालीन माओवादीले जित्दै आएको यो क्षेत्रमा प्रचण्ड चुनाव लड्न आएपछि यहाँको चुनावी माहोल थप तातिएको छ ।