चौरजहारीमा भएको फुटबल प्रतियोगिताको आयव्यय सार्वजनिक, तीन लाख २० हजार रुपियाँ बचत

रुकुम पश्चिमको चौरजहारी नगरपालिका १ मा हालै सम्पन्न खुल्ला फुटबल प्रतियोगिताको आयव्यय सार्वजनिक गरिएको छ । 

शीतल चौरजहारी बि ६७ ले गत असोज २९ गतेदेखि कात्तिक २ गतेसम्म सञ्चालन गरेको फुटबल प्रतियोगिताको आम्दानी र खर्च मंगलबार पत्रकार सम्मेलन गरेर सार्वजनिक गरेको हो । 

प्रतियोगिताका व्यवस्थापक तिलक लामिछानेका अनुसार कुल आय छ लाख दुई हजार ४६५ रुपियाँ भएकोमा दुई लाख ८२ हजार ९५ रुपियाँ खर्च भएको छ । आयोजक संस्थामा तीन लाख २० हजार ४०६ रुपियाँ बचत रहेको र उक्त रकम सामाजिक कार्यमा खर्च गर्ने निर्णय भएको व्यवस्थापक लामिछानेले जानकारी दिनुभयो । 

पुरस्कार, खेल तथा रेफ्रि व्यवस्थान, स्टेज तथा खेलमैदान व्यवस्थापन लगायतका शिर्षकमा रकम खर्च भएको बताईएको छ । खेलकुद प्रतियोगिताको रकम सार्वजनिक र बचत गरेको विवरण नमूनायोग्य काम भएको बताईएको छ । 

आयोजक संस्थाका अध्यक्ष तेज कुमार बिष्टले विभिन्न व्यक्ति तथा निकायको सहयोगमा प्रतियोगिता सम्पन्न गरेको जानकारी गराउनुभयो । उहाँका अनुसार प्रतियोगिताको मुख्य प्रायोजक चौरजहारी नगरपालिका १ स्थित राजन अटो पार्टस, वीरेन्द्रनगर सुर्खेतस्थित दिपु एण्ड दर्शना अटो पार्टस् र बाँकेको कोहलपुरस्थित सिस्ने पुस्तक एण्ड स्पोर्ट हाउस रहेका थिए । त्यसैगरी सानीभेरी वाटर एण्ड फुड प्रोडक्सन लिमिटेड र शीतल क्याम्पस चौरजहारी प्रायोजक रहेका थिए । 

प्रतियोगिताको सह प्रायोजकमा केसी जनरल स्टोल, पुर्ण अर्डर सप्लायर्स, हमाल सप्लायर्स, कसम होटेल एण्ड लज, बि स्काई होटेल एण्ड लज, अनिल किराना पसल, एम.बि. कन्ट्रक्सन र सहिद यज्ञश्वर स्मृति प्राविधिक शिक्षालय रहेका थिए । 

प्रतियोगितामा १६ वटा समुहले भाग लिएका थिए । प्रतियोगिताको विजेता टिम केएफसी जाजरकोट बनेको थियो भने उपविजेता चौरजहारीस्थित नाखिरा युवा क्लब बनेको थियो ।  

आर्थिक विवरण सार्वजनिक कार्यक्रममा चौरजहारी नगरपालिकाका निमित्त प्रमुख प्रशासकीय अधिकृत शेर प्रसाद ढकाल, वडा नम्वर १ का वडा अध्यक्ष ईन्द्रे गिरी, नेपाली कांग्रेसका जिल्ला सदस्य एवम् संगठन विभाग प्रमुख यदुकुमार आचार्य, नेकपा एमाले चौरजहारीका जनक लामिछाने, नेकपा माओवादी केन्द्रका नारायण प्रसाद खनाल, नेपाल रेडक्रस सोसाइटी चौरजहारीका सभापति तेजबहादुर बटाला लगायतको सहभागिता रहेको थियो । कार्यक्रमको सञ्चालन आयोजक संस्थाका निर्जल केसीले गर्नुभएको थियो । 

चौरजहारीस्थित शीतल माध्यमिक विद्यालयबाट २०६७ सालमा एसएलसी दिएका विद्यार्थीहरुको समुहले उक्त संस्था दर्ता गरेको हो । सामाजिक रुपान्तरणका लागि युवा भन्ने मुख्य नाराका साथ विभिन्न सामाजिक र परोपकारी कार्य गर्ने उद्धेश्यले उक्त संस्था स्थापना भएको हो ।

यो समुहले यस अघि बिरामी, असाहय, टुहुरा लगायत समस्यामा परेकाहरुलाई सहयोग गर्दै आएको छ भने मानविय सेवाको रुपमा रक्तदान लगायतका कार्य गरेको छ ।

शीतल चौरजहारी बी ६७ र फुटबल प्रतियोगिता एक साथ उद्घाटन