ट्याखोलामा गोल्ड कपको धमाका सुरु

ट्याखोला खेलकुद संघको आयोजनामा आईतबारबाट महिला तथा पुरुष फुटबल प्रतियोगिता सञ्चालन भएको छ । रुकुम पश्चिमको मुसिकोट नगरपालिका वडा नम्बर ४, ६ र ११ को संगम स्थल ट्याखोला खेल मैदानमा ट्याखोला गोल्ड कप सुरु भएको हो ।

मुसिकोट नगरपालिकाका प्रमुख महेन्द्र केसीले उद्घाटन गर्नुभएको यो प्रतियोगिता पाँचौ संस्करणको हो । ट्याखोला खेलकुद संघका अध्यक्ष मनोज बुढाथोकीका अनुसार प्रतियोगिता अन्तर्गत पुरुष फुटबलमा ३२ वटा र महिला फुटबलमा ५ टिम दर्ता भएका छन् । 

उहाँका अनुसार पुरुष तर्फको विजेताले नगद ८० हजार र उप विजेताले ४० हजार पुरस्कार पाउने छन् । महिला तर्फ भने विजेता पुरस्कार २० हजार र उप विजेता पुरस्कार १० हजार राखिएको छ । पुरुष तर्फ दर्ता शुल्क ७ हजार र महिला तर्फ १५ सय तोकिएको छ । 

प्रतियोगिताको दुवै इभेन्टमा व्यक्तिगत विधामा खेलाडी पुरस्कृत गरिने छ । वेस्ट डिफेन्डर, वेस्ट मिडफिल्डर, वेस्ट फरवार्ड, वेस्ट गोल किपर, वेस्ट वेस्ट कोच तथा म्यानेजरलाई पुरस्कृत गरिने छ भने एउटा टिमलाई फेयर प्ले अवार्ड समेत प्रदान गरिने आयोजकले जानकारी गराएको छ ।

संघका अध्यक्ष मनोज बुढाथोकीको अध्यक्षतामा भएको उद्घाटन कार्यक्रममा मुसिकोट नगरपालिकाका प्रमुख महेन्द्र केसीको प्रमुख आतिथ्यता रहेको थियो ।

कार्यक्रममा मुसिकोट नगरपालिका वडा नम्बर २ का अध्यक्ष दिनेश खड्का, १० का अध्यक्ष धनबहादुर खड्का, चण्डी दल गण सल्लेका सह सेनानी, जिल्ला प्रहरी कार्यालयका प्रहरी निरीक्षक झबिन्द्र परियार, राष्ट्रिय स्वतन्त्र पार्टीका मुसिकोट नगर सभापति बिरबल केसी, समाजसेवी डा. दिपक पुन लगायतको आतिथ्यता रहेको थियो ।