अन्तरपार्टी महिला सञ्जालको अध्यक्षमा अन्जना केसी चयन

अन्तरपार्टी महिला सञ्जाल रुकुम पश्चिमको अध्यक्षमा अन्जना केसी चयन हुनुभएको छ । शनिबार मुसिकोट खलंगामा सम्पन्न सञ्जालको भेलाले नेपाली कांग्रेसकी केसीलाई आगामी एक वर्षको लागि अध्यक्षको जिम्मेवारी दिएको हो । 

महिला मानव अधिकार रक्षक सञ्जाल रुकुम पश्चिमका अध्यक्ष ब्युझना पुन देवकोटाका अनुसार अन्तरपार्टी महिला सञ्जालमा सबै पार्टीमा आबद्ध महिला अधिकारकर्मीहरुको जिम्मेवारी रहने व्यवस्था रहेको छ ।  

अन्तरपार्टी महिला सञ्जालको उपाध्यक्षमा नेकपा एमालेकी मनिषा परियार, सचिवमा नेकपा माओवादी केन्द्रकी याम कुमारी नेपाली चयन हुनुभएको छ । कोषाध्यक्ष भने नेकपा (एकिकृत समाजवादी) को भागमा परेको छ । 

सञ्जालको सदस्यहरुमा नेपाली कांग्रेसबाट निता थापा, धनमाया के.सी.रावल, सुजिता बि.सी.गिरी र खिमा के.सी., नेकपा (माओवादी केन्द्र)बाट बिमला खनाल, दिवसा खड्‌का ओली, लक्ष्मी भण्डारी ओली र प्रेमा शाही र नेकपा (एमाले)बाट डम्बरा खड्‌का, हिम हमारी के.सी. रेउले, अञ्जना चन्द गौतम, बम कुमारी ओली के.सी. चयन हुनुभएको छ । 

सञ्जालको विधानमा कार्यसमितिको कार्यकाल एक वर्षको मात्रै हुने व्यवस्था छ । सोही अनुरूप आज भएको भेलाबाट नयाँ समिति निर्माण गरिएको बताइएको छ । जिल्लामा क्रियाशील विभिन्न राजनीतिक दलमा आबद्ध महिला नेतृत्वहरुको छाता संगठनबाट प्रतिनिधित्व हुने गरी अन्तरपार्टी महिला सञ्जाल गठन हुने गरेको छ ।

राजनीतिमा महिलाको समान सहभागिता, सामाजिक न्याय सहितको अधिकार, समानता, घरेलु हिंसा र अन्याय विरुद्ध अन्तरपार्टी महिला सञ्जालले आवाज उठाउने गर्दछ ।