२ हजार भूकम्प प्रभावितले टहराको पहिलो किस्ता नै पाएनन्

रुकुम पश्चिमका दुई हजार भूकम्प प्रभावितहरुले भूकम्प गएको १९ महिना पुरा हुँदासम्म पनि अस्थायी आवास (टहरा) निर्माणको पहिलो किस्ताको रकम पाएका छैनन् । २०८० कात्तिक १७ गते जाजरकोट केन्द्रबिन्दु भएर गएको भूकम्पबाट घर क्षति भएका दुई हजार एक जना प्रभावितले अझैसम्म पनि टहरा निर्माणको रकम नपाएका हुन् । 

प्रमुख जिल्ला अधिकारी एवम् जिल्ला विपत् जोखिम न्यूनीकरण तथा व्यवस्थापन समितिका संयोजक कुलबहादुर जिसीका अनुसार मुसिकोट नगरपालिकाका एक हजार ३५६, त्रिवेणी गाउँपालिकाका २४३ र बाँफिकोट गाउँपालिकाका ४०२ जना भूकम्प प्रभावितले टहरा निर्माणको रकम पाएका छैनन् । उहाँले विपत् व्यवस्थापन समितिको हरेक बैठकमा मुख्य सवालको रुपमा उठ्ने यो समस्या समाधान हुन नसकेको बताउनुभयो ।

विभिन्न समयमा निर्णय गरेर राष्ट्रिय विपत् जोखिम न्यूनिकरण तथा प्राधिकरण समक्ष आवश्यक रकम माग गर्दा पनि सुनुवाई हुन सकेको छैन । उनीहरुलाई टहरा निर्माण पहिलो र दोस्रो किस्ता वापत दश करोड ५० हजार रुपियाँ आवश्यक रहेको छ । 

जिल्लामा ३४ हजार ९९७ लाभग्राही रहेका छन् । जसमध्य ३२ हजार ९९६ जनाले पहिलो किस्ता र ३१ हजार ८८१ लाभग्राहीको लागि रकम निकाशा पठाईसकिएको छ । लाभग्राही कायम भएका मध्य दुई हजार एक जनाको फाईल तोकिएको मितिमा आँउदा पनि विपत् पोर्टलमा समावेश हुन छुटेको कारण टहरा निर्माणको रकम नआएको बताइएको छ । 

बाँफिकोट गाउँपालिकाका अध्यक्ष जनककुमार बाँठाले अहिलेसम्म प्रभावितहरुलाई प्राधिकरणले चिन्न नसकेको बताउनुभयो । पुनर्निर्माण नै सकिनु पर्ने बेलामा टहराको रकम नआउनु दुर्भाग्य भएको उहाँको भनाइ छ ।

त्रिवेणी गाउँपालिकाका अध्यक्ष गणेशकुमार केसीले दुई हजार एक जना भूकम्प प्रभावितले टहरा निर्माण गरेर पनि राज्यले दिने भनेको अनुदान नपाउनु संवेदनशील बिषय रहेको जनाउनुभयो । अप्ठ्यारोमा परेका सोझासिधा जनताले नै पहिलो किस्ता नपाएको अध्यक्ष केसीले बताउनुभयो । यो बिषयमा गम्भिर बन्नुपर्ने केसीले उल्लेख गर्नुभयो । 

यस बिषयमा राष्ट्रिय विपत् जोखिम न्यूनिकरण तथा प्राधिकरणका उपसचिव ज्ञाननाथ ढकालले पहिलो किस्ता नै नपाएका दुई हजार एक जनाको बिषयमा प्राधिकरणको कार्यकारी समिति मै कुरा लिनुपर्ने अवस्था रहेको बताउनुभयो । कर्मचारीस्तरबाट यो समस्या समाधान गर्न नसकिएकोले राजनीतिक र कार्यकारी समितिबाट समाधानतर्फ लाग्नुपर्ने उहाँको भनाइ छ । 

भूकम्पको कारण रुकुमपश्चिममा मात्र ५३ जनाको मृत्यु भएको थियो भने ४०७ जना घाईते भएका थिए । २६८ वटा विद्यालयमा क्षति भएको थियो भने बालबालिका, गर्भवती, सुत्केरी, जेष्ठ नागरिक, दिर्घ रोगी र अपाङ्गता भएका व्यक्ति समेत गरेर २५ हजार ५८४ जनसङख्या प्रभावित भएको थियो । जिल्ला विपद् जोखिम न्यूनीकरण तथा व्यवस्थापन समितिको तथ्याङक अनुसार १२ वटा प्रहरी कार्यालयमा क्षति भएको थियो भने ४० करोड १० लाख बराबर सडक क्षति भएको थियो । 

यो पनि पढ्नुहोस् ...