मार्सलसहित नेसपा रुकुम पूर्वको सिंगो टिम माओवादीमा समाहित

रुकुमपूर्व। जनतासँग माओवादी-मध्यपहाडी लोकमार्ग जनजागरण अभियान अन्तर्गत नेकपा माओबादि केन्द्रका अध्यक्ष पुष्पकमल दाहाल नेतृत्वको टोली बुधबार रूकुम पूर्व पुगेको छ । 

जिल्लाको रुकुमकोटमा आयोजित जनसंवाद कार्यक्रममा अध्यक्ष प्रचण्डले सम्बोधन गर्नुभएको छ ।

सोही अवसरमा जनमुक्ति सेनाका पूर्व कमान्डर तथा नेसपाका पूर्व केन्द्रीय सदस्य जितमान पुन ‘मार्सल’ तथा बाबुराम भट्टराई नेतृत्वको पार्टीको सिंगो कमिटी माओबादी केन्द्रमा समाहित भएका छन् । 

यसका साथै नेकपा (एमाले) निकट दलित मोर्चाका जिल्ला अध्यक्ष उपेन्द्रलाल कामी लगायतका महत्वपूर्ण नेताहरू माओवादी केन्द्रमा प्रवेश गरेका छन् ।

अध्यक्ष प्रचण्डले पार्टीमा प्रवेश गरेका नेताहरूलाई स्वागत गर्दै परिवर्तनको आन्दोलनमा पुनः जुट्न आग्रह गर्नुभएको छ। सरकारको नेतृत्वमा रहेर जनताको पक्षमा गरेका कामको कारण आएको पार्टी प्रतिको सकारात्मक लहर ऐतिहासिक र प्रेरणादायी भएको उहाको भनाई छ । 

उहाले विचार, सिद्धान्त र लक्ष्यको आधारमा एकताबद्ध भएर अघि बढ्न सबैलाई आह्वान गर्नुभयो। कार्यक्रममा स्थानीय बुद्धिजीवी, व्यवसायी, राजनीतिक कार्यकर्ता, र कर्मचारीहरूको उल्लेखनीय उपस्थिति रहेको थियो।

कार्यक्रममा सम्बोधन गर्दै अध्यक्ष प्रचण्डले जनयुद्धका उपलब्धि, राजनीतिक रूपान्तरणको वर्तमान अवस्था र जनताको सहभागितामूलक लोकतन्त्रको आवश्यकता बारे धारणा राख्नुभयो। उहाँले अभियानको उद्देश्य जनताको विश्वास र सहभागिता पुनः मजबुत बनाउने रहेको स्पष्ट पार्नुभयो।