प्रचण्ड आज चौरजहारीमा, विशाल जनसभालाई सम्बोधन गर्नुहुँदै

पूर्व प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल आज रुकुम पश्चिमको चौरजहारीमा आउने हुनुभएको छ । 

नेकपा माओवादी केन्द्रको जनतासँग माओवादी, मध्यपहाडी लोकमार्ग जनजागरण अभियान अन्तर्गत चौरजहारीमा हुने विशाल जनसभालाई सम्बोधन गर्न उहाँ चौरजहारी आउनु हुने भएको हो । 

अभियान अन्तर्गत हिजो जाजरकोट आईपुग्नु भएका प्रचण्ड आज रुकुम पश्चिममा अभियान अन्तर्गत विभिन्न कार्यक्रममा सहभागी हुनुहुने नेकपा (माओवादी केन्द्र) रुकुम पश्चिमले जनाएको छ ।

आज दिउँसो चौरजहारी नगरपालिका २ को शंखपिपलमा विशाल जनसभा हुँदै छ भने बेलुका मुसिकोटमा जनसंवाद कार्यक्रम हुने पार्टीका जिल्ला संयोजक गोबिन्द रोका सचिनले जानकारी दिनुभयो । 

अभियान टोलीकाे नेतृत्वकर्ता तथा पार्टी अध्यक्ष प्रचण्ड नेतृत्वको टोलीले चौरजहारीस्थित पार्टी कार्यालयमा सहिद परिवारसँग भेटघाट, जनयुद्धका घाइते, अपाङ्ग तथा पूर्व जनमुक्ति सेनाको टिमसँग भेटघाटको कार्यक्रम तय भएको संयोजक रोकाले बताउनुभयो ।

त्यसलगत्तै जनसभालाई हुने र बेलुका मुसिकोट नगरपालिका ५ शेरिगाउँस्थित सहिद प्रतिष्ठानको सभा हलमा जनसंवाद कार्यक्रम हुने बताईएको छ ।