खानेपानी आयोजनामा आगलागी हुँदा साढे दश लाखको क्षती

रुकुम पश्चिमको चौरजहारीमा सञ्चालित खानेपानी आयोजनामा आगलागी हुँदा साढे दश लाख बराबरको क्षती भएको छ । 

बिजयश्वरी चौरजहारी खानेपानी संस्थाद्वारा सञ्चालित खानेपानी आयोजनामा शुक्रबार एक्कासी आगलागी भएको हो । संस्थाका व्यवस्थापक बसन्त भण्डारीका अनुसार आगलागीको कारण २५० केभि क्षमताको ईस्टेपराईजर लगायतका सामाग्रीमा क्षती पुगेको छ । 

इस्टेपलाइजर नै पट्किएपछी आगजनी भएको बताईएको छ । आगजनी भएको थाहा हुने बित्तिकै ट्रान्सर्फमरबाट बिद्युत लाइन काटेको थप क्षती हुनबाट जोगाईएको थियो । 

उपकरणमा आगजनी भएपछि चौरजहारी नगरपालिकाको वडा नम्वर १, २ र ३ मा खानेपानी वितरणमा अनियमितता भएको छ । संस्थाले अहिले सोलार सिस्टममार्फत पानी वितरण गर्ने व्यवस्था मिलाएको छ । 

व्यवस्थापक भण्डारीले सर्वसाधारणहरुलाई आलोपालो गरेर खानेपानी वितरण गरिरहेको उल्लेख गर्नुभयो । उहाँका अनुसार आज वडा नम्वर १ को नाखिरा, घारीगाउँ, लामिछाने गाउँ र वडा नम्वर २ को नयाँ बजार र रुकुमेगाउँमा पानी छोडिएको छ भने भोली आईतबार वडा नम्वर २ को गोतामेगाउँ, वडा नम्वर ३ को टाटागाउँ र स्यालखोला बस्तीहरुमा पानीको लाईन छोडिनेछ । 

सोलार सिस्टमले काम नगरेमा आलोपालोमा फेरबदल हुने समेत उहाँले जनाउनुभयो । 

नयाँ इस्टप्लाईजर खरिदको लागि अर्डर भईसकेको संस्थाले जनाएको छ । आईतबार उक्त सामाग्री आईपुग्ने र सोमबारबाट खानेपानी वितरण नियामित हुने जनाईएको छ । 

यस संस्थाले अहिले यहाँका एक हजार ६५५ जना ग्राहकलाई घरघरमै धारा मार्फत खानेपानी वितरण गरिरहेको छ ।