मुसिकोटको राजाचौरमा रहेको कालिका मन्दिरमा तोडफोड

रुकुम पश्चिमको मुसिकोट नगरपालिका -५ को राजाचौरमा रहको एक मन्दिरमा तोडफोड भएको छ । 

वडाको ज्यामिनडाँडा, घुयलपानी, डाङडुङगेको संगमस्थल राजाचौरमा रहेको कालिका मन्दिरमा आज तोडफोड भएको स्थानीय युवा मनोज बुढाथोकीले जानकारी दिनुभयो । 

उहाँका अनुसार दसैं सुरु भएसँगै हरेक दिन मन्दिरमा पुजा हुने गर्दछ । आज बिहान पुजा कार्य सम्पन्न पछि सबै जना घर गएको र अहिले बेलुका पख दमाहसहितको टोली मन्दिरमा पुजा कार्यको लागि पुग्दा तोडफोड भएको पाईएको हो । 

आफु पनि नियमित पुजा कार्यमा सहभागी हुने क्रममा मन्दिरमा जाने भएकोले अहिले मन्दिरमा तोडफोड गरिएको देखिएको उहाँले बताउनुभयो ।

बुढाथोकीका अनुसार मन्दिरको ढोका फुटाईएको छ भने मन्दिर भित्र रहेका तामाका चिजहरु (पञ्चपाला, गणेशलाई पुजा गरिएका अम्खोरा) हराएका छन् । उहाँले भेटि समेत गायब भएको तर कति थियो भन्ने यकिन नभएको जानकारी दिनुभयो । 

घटना बारेमा बाग बजारस्थित प्रहरी पोष्टलाई जानकारी गराएको र थप अनुसन्धान कै क्रममा रहेको उहाँले जनाउनुभयो ।