भूकम्प प्रभावितको लागि नमूना आवास निर्माण सुरु 

रुकुम पश्चिम र जाजरकोटका केहि भूकम्प प्रभावित परिवारहरुको लागि नमूना आवास निर्माणको काम सुरु भएको छ । 

गत वर्षको कार्तिक १७ गतेको भूकम्पबाट प्रभावित जाजरकोट र रुकुम पश्चिमका २३ जना अति विपन्न तथा सिमान्कृत समुदायको लागि नमूना आवास निर्माण गर्न थालिएको हो । 

अन्तराष्ट्रिय आप्रवासन संगठन (आईओएम) को सहयोगमा कम्युनिटी इम्प्याक्ट नेपालद्वारा सञ्चालित जेआरएपी परियोजना अन्तर्गत नमूना आवास निर्माण हुने भएका हुन् । परियोजनाका संयोजक आशिष गौतमका अनुसार भूकम्प प्रभावित अति विपन्न, अपांगता भएका र सिमान्तकृत समुदायका व्यक्तिहरुलाई लक्षित गरेर आवास निर्माण गर्न थालिएको हो ।  

आज सोमबार जाजरकोटको भेरी नगरपालिका –१ मा एक कार्यक्रमका बिच नगर उप प्रमुख सीता जैसीले नमूना आवास निर्माणका लागि दुई वटा भवनको शिलान्यास गर्नुभएको छ । स्थानीय एकल महिला बबिता राना र अपांगता भएका परिमले रानाको आवास निर्माण शुभारम्भ भएको हो । 

त्यसैगरी आजै रुकुम पश्चिमको आठबिसकोट नगरपालिका वडा नम्वर ११ मा एक नमूना आवास निर्माणको काम सुरु गरिएको छ । वडा अध्यक्ष प्रेम बहादुर पुनले उक्त आवासको शिलान्यास गर्नुभएको हो । 

कम्युनिटी इम्प्याक्ट नेपालका परियोजना संयोजक गौतमका अनुसार पहिलाे चरणमा जाजरकोटमा १२ वटा र रुकुम पश्चिममा ११ वटा नमूना आवास निर्माण गरिने छ । २३ वटा मध्य दुई वटा सिमेन्ट, ढुंगा, माटोको हुनेछन् भने २१ वटा इन्टर लकिङ इट्टा प्रयोग गरेर निर्माण हुनेछन् । यी सबै भवन भूकम्प प्रतिरोधी भवन हुनेछन् । 

रुकुम पश्चिमको आठविसकोटमा चार वटा, सानीभेरी गाउँपालिकामा दुई वटा, चौरजहारी नगरपालिकामा दुई वटा, बाँफिकोट गाउँपालिका, त्रिवेणी गाउँपालिका र मुसिकोट नगरपालिकामा एक एक वटा गरेर ११ वटा नमूना आवास निर्माण हुनेछन् । 

त्यसैगरी जाजरकोटको भेरी नगरपालिकामा चार वटा, नलगाड नगरपालिकामा दुई वटा, बारेकोट गाउँपालिकामा दुई वटा, कुशे गाउँपालिका, जुनिचाँदे गाउँपालिका, शिवालय गाउँपालिका र छेडागाड नगरपालिकामा एक एक वटा गरेर १२ वटा नमूना आवासन निर्माण हुने बताईएको छ । 

जाजरकोटको भेरी नगरपालिका –१ मा भएको नमूना भवन शिलान्यास कार्यक्रममा आईओएमका संयोजक चेरी अबिला, वडा अध्यक्ष दिपक राना, आईओएम र बिल्ड अप नेपालका इन्जिनियर, सामाजिक परिचालक, कर्मचारीहरु लगायतको उपस्थिति रहेको थियो ।