रुकुम पश्चिमका ६ पालिकाले ल्याए तीन अर्ब ६२ करोडको बजेट

रुकुम पश्चिमका छ वटै स्थानीय तहले आगामी आर्थिक वर्ष ०८३/०८४ को लागि बजेट ल्याएका छन् । तीन नगरपालिका र तीन गाउँपालिकाले कुल तीन अर्ब ६२ करोड ७१ लाख ७६ हजार ९०४ रुपियाँको बजेट ल्याएका हुन् । 

जिल्लाको मुसिकोट नगरपालिकाले सबैभन्दा ठुलो बजेट ल्याएको छ । नगर उपप्रमुख बिमल कुमार पुनले ७३ करोड ७३ लाख २३ हजार ८४८ रुपियाँको बजेट सार्वजनिक गर्नुभएको हो । जसमध्य चालुतर्फ ५१ करोड ७९ लाख २३ हजार ४८ रुपियाँ र पूजीँगततर्फ २१ करोड ९४ लाख रकम विनियोजन भएको छ ।

आठबिसकोट नगरपालिकाले जम्मा ७१ करोड ३७ लाख ४७ हजारको बजेट ल्याएको छ । नगर उप प्रमुख धनकुमारी शाहीले चालुतर्फ ४६ करोड ३३ लाख ७४ हजार र पूजीँगततर्फ २५ करोड तीन लाख ७३ हजारको बजेट नगर सभामा पेश गर्नुभएको हो ।

त्यसैगरी चौरजहारी नगरपालिकाले ५७ करोड २३ लाख ८२ हजार पाँच सयको बजेट ल्याएको छ  । आर्थिक विकास समितका संयोजक श्रीकृष्ण शर्माले चालुतर्फ ४४ करोड ११ लाख ५३ हजार ४७० र पूजीँगततर्फ १२ करोड १२ लाख २९ हजार ३० रुपियाँ छुट्याएको जानकारी दिनुभयो । 

जिल्लाको सानीभेरी गाउँपालिकाले ५५ करोड आठ लाख २४ हजारको बजेट ल्याएको छ । गाउँपालिका उपाध्यक्ष कमला रोकाले चालुतर्फ ३९ करोड ३३ लाख ९२ हजार ४३२ र पूजीँगततर्फ १५ करोड ७४ लाख ३१ हजार ५६८ रुपियाँको बजेट पेश गर्नुभएको हो । 

त्रिवेणी गाउँपालिका उपाध्यक्ष राजकुमारी रेउलेले ५४ करोड ९४ लाख ३९ हजार ९५६ रुपियाँको बजेट ल्याएको जानकारी दिनुभयो । उहाँका अनुसार चालुतर्फ ३८ करोड ९६ लाख ३९ हजार ९५६ र पूजीँगततर्फ १५ करोड ९८ लाख रकम विनियोजन गरिएको छ । 

त्यसैगरी बाँफिकोट गाउँपालिकाले ५० करोड ३४ लाख ५९ हजार छ सय रुपियाँको बजेट सार्वजनिक गरेको छ । गाउँपालिका उपाध्यक्ष तारा बुढा केसीले चालुतर्फ ३६ करोड ६५ लाख र पूजीँगततर्फ १३ करोड ६९ लाख ५९ हजार छ सय रुपियाँको बजेट ल्याएको जानकारी दिनुभयो । 

स्थानीय तहले प्रस्तुत गरेको बजेटमा शिक्षा, स्वास्थ्य, कृषि, पूर्वाधार विकास, खानेपानी, रोगजार सिर्जना, पर्यटन प्रवद्र्धन, सामाजिक सुरक्षा सम्बन्धी कार्यलाई प्राथमिकता दिएका छन् ।