रुकुम पश्चिममा दोस्रो इन्द्रेणी कप हुँदै 

रुकुम पश्चिमको त्रिवेणी गाउँपालिका–५, मा रहेको इन्द्रेणी युवा क्लबको आयोजनामा दोस्रो इन्द्रेणी कप हुने भएको छ। 

इन्द्रेणी युवा क्लबका सचिव धनु ओलीका  अनुसार  २०८३ कार्तिक ५ गतेदेखि ९ गतेसम्म विभिन्न खेलकुद प्रतियोगिता तथा सांस्कृतिक कार्यक्रमसहित दोस्रो इन्द्रेणी कप आयोजना गर्न लागिएको हो। 

क्लबका अनुसार प्रतियोगिताअन्तर्गत भलिबल खेल शुद्ध वडा स्तरीय रूपमा सञ्चालन गरिनेछ भने भलिबल बाहेकका अन्य खेलहरू खुल्ला रूपमा सञ्चालन गरिने छन् । अन्य खेलहरुमा फुटबल, हाजिरी जवाफ, लोक दोहोरी, वक्तृत्वकला, एकल नृत्य, रस्साकस्सी, घैटोफोर, भाले तान्ने र बेलुन फुटाउने प्रतियोगिताहरु आयोजना गरिएको छ ।

प्रतियोगितामा विभिन्न क्षेत्र तथा स्थानबाट खेलाडी तथा खेलप्रेमीहरूको सहभागिता रहने बताईएको छ। युवा तथा खेलाडीहरूमा रहेको प्रतिभा पहिचान तथा विकास गर्ने, खेलकुदको माध्यमबाट आपसी भाइचारा र सद्भाव कायम गर्ने तथा स्थानीय स्तरमा खेलकुदको वातावरण निर्माण गर्ने उद्देश्यले प्रतियोगिता आयोजना गर्न लागिएको इन्द्रेणी युवा क्लबका सचिव ओलीले जानकारी दिनुभयो ।

इन्द्रेणी युवा क्लबले प्रतियोगितालाई सभ्य, भव्य र व्यवस्थित रूपमा सम्पन्न गर्न सम्पूर्ण खेलाडी, खेलप्रेमी, स्थानीयवासी तथा शुभेच्छुकहरूलाई सहयोग र सहभागिताका लागि अनुरोध गरेको छ।