सानीभेरीमा बाढीले बगायो घर, पशुचौपाया, पानी घट्ट, किराना पसल र धानखेती

अविरल वर्षा, हावाहुरी र असिनाको कारण रुकुमपश्चिमको सानीभेरी गाउँपालिका १० अर्मामा एक घर बगाएको छ भने १६ पशुचौपायाको बगेर मृत्यु भएको छ । बाढीको कारण दुई पसल, आठ पानी घट्ट बगाएको छ भने पशुचौपाया, धानबाली र खानेपानीको संरचनामा ठुलो क्षति भएको छ । 

जिल्ला प्रहरी कार्यालयका अनुसार सोमबार राति परेको वर्षापछि आएको बाढीले किसानको गोठसहित चार वटा भैसी, दुई गोरु, तीन खसी, छ बाख्रा र एक भेडा बगाएको छ भने दुई वटा किराना पसल, आठ वटा पानी घट्ट र दुई शौचालय बगाएको छ । दुई वटा खानेपानीका मुहान पुरिएका छन् भने मानवीय क्षति भएको छैन । 

प्रहरी नायब उपरीक्षक (डिएसपी) बेदबहादुर पौडेलका अनुसार स्थानीय अर्मा खोलामा आएको बाढीले घारीखोला देखि रिठाबगरसम्म १५ जना सर्वसाधारणहरुको सम्पती क्षति गरेको हो । बाढीले स्थानीय उदिराम खड्काको एक कच्चि घर र एक गोठसहित एक भैसी, तीन खसी, एक भेडा र छ वटा बाख्रा बगाएको छ । बाढीको कारण उहाँको घरमा रहेको नगद र गरगहना पनि बगाएको छ । उहाँको सम्पूर्ण परिवारलाई सहोदर भाई मोतिराम खड्काको घरमा स्थानान्तरण गरिएको छ ।   

त्यसैगरी बाढीले स्थानीय गंगाराम ख्डकाको गोठसहित तीन वटा भैसी बगाएको छ भने पञ्चराम डाँगीको दुई वटा गोरु बगाएको छ । बाढीले खड्कबहादुर खड्का र बमबहादुर बिकको किराना पसल पनि बगाएको छ । प्रहरीका अनुसार बाढीले यहाँका आठ जना सर्वसाधारणको पानी घट्ट बगाएको जनाएको छ ।

स्थानीय तिलक बिक, दिलबहादुर डाँगी, मनजित बिक, नैनवीर खड्का, हस्त खड्का, पदमबहादुर खड्का, मोतिराम खड्का र पञ्चराम खड्काले सञ्चालन गरेको पानी घट्ट बगाएको हो । सोही बाढीले स्थानीय चन्द्रबहादुर खड्का र कविता बिकको शौचालय समेत बगाएको छ । 

वडा अध्यक्ष टिकाराम खड्काले बाढीले सामान्य आर्थिक अवस्था भएका जनताको क्षति गरेको बताउनुभयो । उहाँले बाढीले खोला किनार आसपासको करिब पाँच बिगाह खेतमा लगाएको धानबाली पनि पूर्ण रुपमा क्षति गरेको जानकारी दिनुभयो । पाक्ने अवस्थामा रहेको धानबाली नष्ट हुँदा किसानहरु मर्कामा परेका छन् ।