मगर युनिटी फुटबल क्लबलाई फुटसल र रुकुम भलिबल प्रशिक्षण केन्द्रलाई भलिबलको उपाधि

रुकुम पूर्वको पुथा उत्तरगंगा गाउँपालिका -११ को उपल्लो सेरामा हिमालयन शृङ्खला चौरे युवा क्लबले आयोजना गरेको खुल्ला पुरुष तथा महिला फुटसलर र  भलिबल प्रतियोगिता सम्पन्न भएको छ  ।
फुटसल प्रतियोगितामा पुरुष तथा महिला दुवै विधामा मगर युनिटी फुटबल क्लब रुकुम पूर्वले उपाधी हात पारेको छ ।  पुरुषतर्फको फाइनल खेलमा मगर युनिटी फुटबल क्लबले ब्रदर्स एफसी बर्दियालाई ५–२ गोल अन्तरले पराजित गर्दै उपाधि जितेको हो भने महिलातर्फ मगर युनिटी फुटबल क्लबले बराह युवा क्लब, दाङलाई ५–१ गोल अन्तरले हराउँदै उपाधिमाथि कब्जा जमाएको हो । 

पुरुष तर्फ उपाधि विजेताले एक लाख र महिलातर्फ विजेतालाई ५० हजार नगद पुरस्कार प्रदान गरिएको छ । 

यसैगरी खुल्ला पुरुष भलिबलको उपाधि रुकुम भलिबल प्रशिक्षण केन्द्रले जितेको छ । शनिबार भएको फाइनल खेलमा पोखरा युनाइटेडलाई ३,१ को सेटमा हराउँदै रुकुम भलिबल प्रशिक्षण केन्द्रले उपाधि जितेको हो ।

उपाधि जितेसँगै प्रशिक्षण केन्द्रले दुई लाख पुरस्कार सहित मेडल, प्रमाणपत्र र सिल्ड हात पारेको अध्यक्ष तेज बुढाले बताउनुभयो । यसपटकको उपाधि जित सँगै लगातार तीन वर्ष उपाधि जितेर प्रशिक्षण केन्द्रले स्थायी रूपमा चाँदीको सिल्ड हात पारेको उहाँको भनाइ छ ।

प्रतियोगितामा उपविजेता बनेको पोखरा युनाइटेडले १ लाख प्राप्त गर्दा तेस्रो हुने भुमेले ५० हजार पुरस्कार राशि प्राप्त गरेको छ ।

हिमालय श्रृङ्खला चौंरी युवा क्लबले आयोजना गरेको ३१ औँ वार्षिक उत्सव राँके मेला तथा विविध प्रतियोगिता सहितको कार्यक्रम साउन २ गते उद्घाटन भएको थियो ।