आठबिसकोट नगरपालिका ५ ले भोटेकोसी बाढीपीडितलाई ५० हजार सहयोग गर्ने

रुकुम पश्चिमको आठबिसकोट नगरपालिकाको ५ नम्वर वडा कार्यालयले भोटेकोसी नदिमा आएको बाढीबाट पीडितहरुको लागि सहयोग गर्ने जनाएको छ । वडा कार्यालयले बाढीपीडितको लागि ५० हजार रुपियाँ सहयोग गर्ने निर्णय गरेको हो ।  

वडा अध्यक्ष घनश्याम भण्डारीले प्रधानमन्त्री दैवी प्रकोप उद्धार कोषमा वडा कार्यालयको तर्फबाट ५० हजार रुपियाँ जम्मा निर्णय गरएिको जनाउनुभयो । कार्यालय खुलेपछि वडा कार्यालयको तर्फबाट उक्त रकम जम्मा गर्ने उहाँले उल्लेख गर्नुभयो । 

भदौ १० गते बिहान रसुवा जिल्लाको गोसाईकुण्ड गाउँपालिका २ टिमुरे स्थित भोटेकोशी नदीमा तिब्बततर्फबाट आएको ठुलो बाढी पहिरोले धनजनको क्षती भएको घटना प्रति गहिरो दुःख व्यक्त गर्नुहुँदै उहाँले विपद्को बेला हरेकले सक्दो सहयोग गर्न आवश्यक रहेको बताउनुभयो । उहाँले बेपत्ताहरुको खोजी, राहत तथा उद्धार प्रकृयामा सहज होस भन्ने अभिप्रायले वडा कार्यालयले उक्त सहयोग गर्ने बताउनुभयो । 

वडा कार्यालयले वडाको विपद् व्यवस्थापन शिर्षकको रकम भोटेकोसीका पीडितहरुको लागि पठाउने निर्णय गरेको हो । वडा अध्यक्ष भण्डारीले यस्तो अवस्थामा सबैले सक्दो सहयोग गर्न समेत आह्वान गर्नुभयो ।