समसामयीक

यसपालिको दसैं, दशा बन्यो !

गोपालसिं खड्का

सोमबार, कात्तिक २, २०८३

यस वर्षको दसैं, दसैं भएन दशा बन्यो
न त छरियो जमरा, न भयो खुसीको छहारी
भयो त केवल दुःख र पीडा
यसपालिको दसैं, दसैं होइन - दशा बन्यो !

पहिरो आयो, बास उडायो, बनायो सबै चिल्लबिल्ल
सन्तान सबै टाढा–टाढा, सुनसान भयो घरआँगन
मनमा छायो पीडाको बादल
आउँछु भन्ने सबै कता गए, कता
रसुवाको बाढीले बगायो कति सपना
यता १९ गतेको घटनाले पनि पार्‍यो सबै चिल्लबिल्ल
खुसी खोज्दा पीडा भेटियो, दसैं आयो, मन रमाउन सकेन

यसपालिको दसैं, दसैं होइन - दशा बन्यो !

घटस्थापनाको दिन आयो
अब त गाउँघर रमाइलो होला
आँगनभरि आफन्तको जमघट होला
हाँसो र खुसी छाउनेछ होला ...
यस्तै आशा थियो मनभरि

तर गाउँघर सुनसान भयो

यसपालिको दसैं, दसैं होइन - दशा बन्यो !

बोकाको बलि दिन तयार थिए
मीठोमसिनो खाने रहर थियो
आफन्तसँगै बसेर रमाउने चाहना थियो
तर अहँ, खुसीको खबर आएन, रौनक र रमझम कतै देखिएन

यसपालिको दसैं, दसैं होइन - दशा बन्यो !

न त छरियो जमरा, न त निधारमा टीकाको रौनक
न त आँगनमा आफन्तको जमघट, न त घरभरि हाँसोको गुञ्जन
दशैँ त आयो पात्रोमा, तर खुसी आएन जीवनमा
चाड त आयो हरेक वर्षझैँ, तर मन रमाउन सकेन पहिलेजस्तै
यसपालिको दसैं, दसैं रहेन !

न त खुसी रह्यो, न त उमङ्ग
विपत्तिले उजाड बनायो गाउँघर
दशैँको नाममा बाँकी रह्यो पीडा र तरङ्ग
अर्को वर्ष यस्तो दशा कसैलाई नपरोस्
कसैको घर पहिरोले नउजाडोस्
कसैको सपना बाढीले नबगाओस्
टाढिएका आफन्त फेरि घर फर्किऊन्
हरेक घरमा खुसी र शान्ति छाओस्।

हाम्रो त यसपालिको दसैं, दसैं रहेन
भयो त केवल - दसैंको दशा !!

प्रकाशित मिति: सोमबार, कात्तिक २, २०८३

प्रतिक्रिया दिनुहोस्