रुकुम पूर्वमा जङगली च्याउ खाँदा बिरामी भएका सात जनाको अवस्था सुधार हुँदै

रुकुम पूर्वको पुथा उत्तरगंगा गाउँपालिका २ को रल गाउँमा जङगली च्याउ खाँदा सात जना बिरामी भएका छन् ।  जिल्लाको विकट तथा दुर्गम गाउँ रलमा शनिबार बिहान बिरामी भएका उहाँहरुलाई हेलिकप्टरबाट उद्धार गर्ने प्रयास असफल भएपछि पाँच घण्टा पैदल हिँडेर गएका स्वास्थ्यकर्मीले ज्यान जोगाएका छन् ।

स्थानीय ६० वर्षीय धर्मटेक पुन, ३२ वर्षीय लोकेन्द्र पुन, ३४ वर्षीय रचन पुन, ४३ वर्षीय खडक पुन, ३७ वर्षीया रथना पुन, ४१ वर्षीय दन्त रोका र ४९ वर्षीय बरण रोका बिरामी हुनुभएको हो । रुकुम पूर्वका प्रमुख जिल्ला अधिकारी कोपिला राईका अनुसार शनिबार बिहान जङगलबाट ल्याएको च्याउ खाँनासँगै खाएपछि उहाँहरु बिरामी परेको खबर आएको थियो । उहाँहरुमा बान्ता हुने, टाउको दुख्ने, पखाला लाग्ने, बेहोस् हुने जस्ता समस्या देखिएको थियो ।

दुर्गम र विकट गाउँमा घटना घटेको र स्वास्थ्य अवस्था चिन्ताजनक रहेको भनेर स्थानीयले खबर गरेपछि उद्धारको लागि हेलिकप्टर ल्याउने सबै प्रक्रिया पुरा गरिएको थियो । खराब मौसमको कारण हेलिकप्टर जाने अवस्था नै नभएको प्रमुख जिल्ला अधिकारी कोलिपा राईले जानकारी दिनुभयो । शनिबार दिनभर हेलिकप्टर पठाउने तयारी गरिएको तर सफल हुन नसकेको उहाँले बताउनुभयो । उहाँका अनुसार मैकोटबाट घण्टौ हिँडेर गएका स्वास्थ्यकर्मीहरुले बिरामीको ज्यान जोगाउनु भएको छ । 

शनिबार दिनभर, राती अबेला र आज बिहान पनि बिरामीका आफन्तजन, प्रमुख जिल्ला अधिकारी, जिल्लाको सुरक्षा निकायको टोली, जिल्ला अस्पताल र गाउँपालिकाको टोलीले समन्वयमा गरिरहेको छ । बिरामीका आफन्तले स्वास्थ्य अवस्था सुधार भएकोले अब हेलिकप्टर आवश्यक नपर्ने भनेर खबर गरेको प्रजिअ राईले जनाउनुभयो । 

पुथा उत्तरगंगा गाउँपालिकाका स्वास्थ्य शाखाका सह संयोजक कलिभान बिष्टका अनुसार अहिले उहाँहरुको स्वास्थ्य अवस्था सामान्य बन्दै गईरहेको छ । वडा नम्वर १ को मैकोटमा रहेको स्वास्थ्य चौकीबाट तीन जना स्वास्थ्यकर्मीहरु करिब पाँच घण्टा पैदल हिडेर बिरामीहरुको उपचारको लागि रल गाउँ पुगेको बिष्टले जानकारी दिनुभयो । 

प्यारामेडिक्स दिपेन्द्र शाही र सन्तोष कापर र नर्सिङ निर्मला पुन गएराती ११ बजे बिरामीको घरमा पुगेर उपचार गरेपछि बिरामीहरुको अवस्था सामान्य बन्दै गएको हो । बिरामीहरु हिड्न सक्ने भएपछि थप चेकजाँचको लागि मैकोटस्थित स्वास्थ्य चौकीमा ल्याउने सल्लाह भईरहेको सह संयोजक बिष्टले बताउनुभयो ।