रुकुम प्रशासनद्वारा दैनिक सेवा प्रवाहको विवरण सार्वजनिक

जिल्ला प्रशासन कार्यालय रुकुम पश्चिमले नागरिकलाई प्रदान गरिएका दैनिक सेवा प्रवाहको विवरण नियमित रूपमा सार्वजनिक गर्ने गरेको छ । कार्यालयले सेवा प्रवाहमा पारदर्शिता र जवाफदेहितालाई ध्यानमा राख्दै उक्त विवरण सार्वजनिक गर्न थालेको हो । 

कार्यालयले जिल्ला प्रशासन तथा मातहतको इलाका प्रशासन कार्यालय चौरजहारीबाट दैनिक सम्पादन भएका कार्य र प्रवाह गरिएका सेवाको तथ्याङ्क कार्यालयको आधिकारिक वेबसाइट, फेसबुक पेज तथा सूचना पाटीमार्फत सार्वजनिक गर्ने व्यवस्था गरेको जनाएको छ ।

प्रमुख जिल्ला अधिकारी निशान राज गौतमले जेठ पहिलो साताबाट सेवा प्रवाहको विवरण दैनिक रूपमा सार्वजनिक गर्दै आएको जानकारी दिनुभयो । उहाँका अनुसार यस कार्यले सार्वजनिक सेवा प्रवाहमा पारदर्शिता बढ्ने अपेक्षा गरिएको छ भने सरोकारवालालाई आवश्यक जानकारी लिन सहज हुने छ । 

प्रमुख जिल्ला अधिकारी गौतमले सूचनाको हकसम्बन्धी ऐन तथा नियमावलीले गरेको व्यवस्था कार्यान्वयनका क्रममा यो कार्यले निरन्तरता पाउने बताउनुभयो । एकातिर सेवा प्रवाहको प्रगति अभिलेखीकरण हुने र अर्कातिर आगामी दिनको कार्यभारको समेत पूर्वतयारी हुने हुँदा नागरिक र कार्यालयसमेतलाई यो कार्य प्रभावकारी हुने उहाँको भनाइ छ ।

दैनिक प्रकाशित हुने सेवा विवरणले कार्यालयको कार्यसम्पादनलाई थप खुला, उत्तरदायी र नागरिककेन्द्रित बनाउन सहयोग पु¥याउने विश्वास गरिएको प्रमुख जिल्ला अधिकारी गौतमले उल्लेख गर्नुभयो । 

कार्यालयका अनुसार नागरिकता, राहदानी, राष्ट्रिय परिचयपत्र, प्रशासन, मुद्दा तथा सङ्घ संस्थाबाट प्रदान गरिएका सेवाको दैनिक सङ्ख्या सार्वजनिक गरिने गरिएको छ । यस अन्तर्गत नागरिकता वितरण, प्रतिलिपि तथा सिफारिस, राहदानीसम्बन्धी सेवा, राष्ट्रिय परिचयपत्रको विवरण सङ्कलन तथा वितरण, विभिन्न प्रशासनिक सिफारिस, मुद्दा व्यवस्थापन तथा संस्था दर्ता र नवीकरणलगायतका विवरण समेटिने गरेका छन् । 

इलाका प्रशासन कार्यालय चौरजहारीका प्रमुख तोषराज केसीले सेवा प्रवाहसम्बन्धी सूचना नियमित रूपमा सार्वजनिक गर्दा सेवाग्राहीले आफूलाई आवश्यक जानकारी सहज रूपमा प्राप्त गर्न सक्ने, कार्यालयको कार्यक्षमताबारे जानकारी लिन सक्ने तथा सार्वजनिक सेवाप्रतिको विश्वास अभिवृद्धि हुने बताउनुभयो । उहाँले आगामी दिनमा पनि सूचना प्रविधिको अधिकतम उपयोग गर्दै नागरिकमैत्री, पारदर्शी र प्रभावकारी सेवा प्रवाहलाई निरन्तरता दिने प्रयास रहेको जनाउनुभयो । 

गैरसरकारी संस्था महासङ्घका जिल्ला अध्यक्ष भीमराज ओलीले दैनिक सेवा प्रवाहको तथ्याङ्क सार्वजनिक गर्ने कार्यले नागरिकलाई कार्यालयको कार्यसम्पादनबारे जानकारी प्राप्त गर्न सहज भएको बताउनुभयो । यसका साथै सेवा प्रवाहमा पारदर्शिता कायम गर्नसमेत सहयोग पुगेको छ । 

सार्वजनिक निकायको उत्तरदायित्व र सुशासन प्रवर्धनका दृष्टिले पनि यो अभ्यास महत्वपूर्ण रहेको उहाँको भनाइ छ ।  प्रशासन कार्यालयले सुरु गरेको यो कार्य अन्य कार्यालयले पनि अनुसरण गर्न योग्य रहेको अध्यक्ष ओलीले बताउनुभयो ।