रुकुम पश्चिमले जित्यो १०औँ पिएम कप एनभिए लिग

रुकुम पश्चिम भलिबल केन्द्रले १०औँ पिएम कप एनभिए लिगमा पुरुषतर्फको उपाधि जितेको छ ।

त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा शनिबार भएको फाइनलमा रुकुम पश्चिमले हेल्प नेपाल स्पोर्ट्स क्लबलाई ३–० को सोझो सेटमा हरायो ।

रुकुम पश्चिमले  हेल्प नेपालमाथि २९–२७, २५–२१, ३२–३० को रामोञ्चक जित निकालेको हो । उपाधिसँगै रुकुम पश्चिमले १० लाख रुपियाँ पुरस्कार पायो । उपविजेता हेल्प नेपालले पाँच लाख रुपियाँ पुरस्कार प्राप्त गर्‍यो ।

लिगमा महिलातर्फ नेपाल पुलिस च्याम्पियन बनेको छ । शनिबार नै भएको फाइनलमा पुलिसले न्यु डायमन्ड स्पोर्ट्स एकेडेमीलाई ३–१ को सेटमा हराउँदै उपाधि चुमेको हो ।

उपाधिसँगै पुलिसले पनि १० लाख र उपविजेता न्यु डायमन्डले पाँच लाख रुपियाँ पुरस्कार पाएको छ । नेपाल भलिबल सङ्घले आयोजना गरेको लिगमा पुरुषतर्फ आठ र महिलातर्फ ६ गरी कुल १४ टोलीको सहभागिता रहेको थियो । 

पुरुषतर्फ हेल्प नेपाल, त्रिभुवन आर्मी, नेपाल पुलिस, एपिएफ, खिल्जी युवा क्लब (लुम्बिनी), रुकुम पश्चिम, कोशी प्रदेश र बुढानीलकण्ठ क्लब सहभागी थिए । 

महिलातर्फ न्यु डायमन्ड, नेपाल पुलिस, एपिएफ, सुदूरपश्चिम, एभरेस्ट क्लब र त्रिभुवन आर्मी क्लबले भाग लिएका थिए । 

सोहि लिगमा रुकुम पश्चिम भलिबल केन्द्रका अध्यक्ष समेत रहनुभएका तेज बुढा उत्कृष्ट प्रशिक्षकको रुपमा पुरस्कृत हुनुभएको छ ।