घुम्ती शिविरमार्फत सेवा दिदै पुथा उत्तरगङ्गा  

रुकुम पूर्वको पुथा उत्तरगङ्गा गाउँपालिकाले घुम्ती शिविरमार्फत सेवा प्रवाह शुरु गरेको छ । 

गाउँपालिकाले वडा नम्वर ५ को हुकामबाट घुम्ती शिविर सुरु गरेको हो । शिविर १६ गतेसम्म सञ्चालन हुने गाउँपालिकाले जनाएको छ ।

पालिकामार्फत प्रवाह हुने सेवाको पहुँचलाई आम नागरीकहरुको घरदैलोमा पुर्याउनका लागि घुम्ती शिविर आयोजना गरिएको पुथा उत्तरगङ्गा गाउँपालिका वडा नम्वर ५ का वडाध्यक्ष तथा पालिका प्रवक्ता टिकासाई घर्तीले जानकारी दिनुभयो ।

एकिकृत घुम्ती शिविरमार्फत स्वास्थ्य‚ शिक्षा‚ महिला तथा बालबालिका‚ न्यायिक परामर्श सेवा‚ ब्यक्तिगत घटना दर्ता, राजश्व अर्थात कर सम्बन्धी सेवा‚ रोजगार सेवा तथा अन्य स्थानीय तहबाट प्रवाह हुने सेवाहरु प्रवाह गरिने पुथा उत्तरगङ्गा गाउँपालिकाका प्रमुख प्रशासकिय अधिकृत ध्रुव बि.क.ले जानकारी दिनुभयो ।  

शिविरबाट स्वास्थ्यतर्फ प्रारम्भिक स्वास्थ्य जाँच र औषधि वितरण, स्वास्थ्य सम्बन्धी परामर्श सेवा, शिक्षातर्फका अभिभावक शिक्षा, शैक्षिक समिक्षा, अनिवार्य तथा निशुल्क शिक्षा सम्बन्धी सूचना प्रवाह, बिद्यार्थी भर्ना र शैक्षिक परामर्शका सेवा प्रवाह गरिने छ । 

यसैगरी पशुसेवा सम्बन्धी प्राबिधिक परामर्श तथा औषधि बितरण, बालि उपचार सेवा, कृषि तथा पशुपंक्षी फर्म दर्ता तथा नविकरणका सेवाहरु समेत प्रवाह हुने गाउँपालिकाले जनाएको छ ।

एकिकृत घुम्ती शिविरको पहिलो चरणमा १० गते ५ नम्वर वडा कार्यालय हुकाम, ११ गते २ नम्वरं वडा कार्यालय पेल्मा, १२ गते १ नम्वर वडा कार्यालय मैकोट, १३ गते ३ नम्वर वडा रन्मा, १४ गते ४ नम्वर वडा अर्जल, १५ गते ९ नम्वर वडा कार्यालय खारावाङ र १६ गते ६ नम्वर वडा कार्यालय मयाङमा शिविरमार्फत सेवा प्रवाह हुनेछ ।

घुम्ती शिविरलाई प्रवाकारी रुपमा सञ्चालन गर्नका लागि पालिकाबाट उपाध्यक्ष नरपुरा पुन बुढा,  प्रमुख प्रशासकिय अधिकृत ध्रुव बिक, स्वास्थ्य शाखा प्रमुख शेर बहादुर बिसी, शिक्षा शाखा प्रमुख राम प्रसाद खड्का, पशु विकास शाखा प्रमुख भिम प्रकाश केसी, कृषि विकास शाखा प्रमुख ओमप्रकाश ओली, पञ्जिकरण शाखा प्रमुख बिमलराज डांगी, कृषि प्रबिधिक भूपेन्द्र पौडेल, पशु सेवा प्राबिधिक निर्मला पुन र कार्यालय सहायक भावना पुन लगायतका कर्मचारीहरु खटिनुभएको छ । 

गाउँपालिकाले शिविरबाट सेवा लिन सेवाग्राहीहरुलाई अनुरोध गरेको छ ।