स्थलगत योजना अनुगमनमा प्रदेश मन्त्री बुढा

कर्णाली प्रदेश सरकारका जलस्रोत तथा उर्जा विकास मन्त्री बिजया बुढाले रुकुम पश्चिममा सञ्चालित विभिन्न योजनाहरुको स्थलगत अनुगमन गर्नुभएको छ । 

उहाँले जिल्लाको सानीभेरी गाउँपालिका र मुसिकोट नगरपालिकाका विभिन्न वडाहरुमा प्रदेश सरकारमार्फत र अन्य विभिन्न निकायद्वारा सञ्चालित विभिन्न योजनाहरुको अनुगमन गर्नुभएको हो । 

अनुगमनपछि सरोकारवालासँगको छलफलमा मन्त्री बुढाले आवश्यकताको आधारमा योजनाहरु प्राथमिकिकरण गर्न आवश्यक रहेको बताउनुभयो । उहाँले मन्त्रालय अहिले योजना निर्माणको चरणमा रहेकोले अत्यावश्यक योजनाहरुलाई उच्च प्राथमिकता दिएको जनाउनुभयो । 

मन्त्री बुढाले यसअघि सरकारले लगानी गरेर पुरा हुन नसकेका योजनाहरुलाई प्राथमिता दिएर पुरा गर्नतर्फ लागेको उल्लेख गर्नुभयो ।  विकासका आयोजनाहरु गुणस्तरिय र समयमै निर्माण गर्न निर्देशन दिनहुँदै मन्त्री बुढाले योजना हस्तान्तरणपछि दिगोपनाको विषयमा पनि गम्भिर हुनुपर्ने बताउनुभयो । 

विकासका कार्यहरुमा अपनत्व नभएसम्म प्रतिफल नआउने भएकोले उपभोक्ता र सरोकारवाला निकायले दीर्घकालिन रुपले सोच्नुपर्ने उहाँको भनाई छ । उहाँले योजना सम्पन्न भएपछि त्यसको संरक्षण, जगेर्ना र नियमित हेरचाहमा उपभोक्ताको सक्रिय सहभागिता अपरिहार्य रहेको पनि बताउनुभयो।

मन्त्री बुढाले सानीभेरी गाउँपालिकाको वडा नम्वर १, ३, र ९, मुसीकोट नगरपालिकाको वडा नम्वर १, १४ म सञ्चालित विभिन्न योजनाहरुको अनुगमन गर्नुभएको हो । उहाँले खानेपानी तथा सिंचाई, तटबन्धन, सरसफाई, स्वास्थ्य क्षेत्रमा सञ्चालित योजनाहरुको अनुगमन गर्नुभएको हो । 

मन्त्री बुढाले युनिसेफ नेपाल र रुकुमेली समाज विकास केन्द्रको साझेदारीमा कार्यान्वयन भएको सानीभेरी गाउँपालिकाको -१ चाईनाबगरस्थित किदरुख–साईरावन–चाईनाबगर खानेपानी योजना र मुसिकोट नगरपालिका -१४ स्थित सुवाखेला–कुमालगाउँ खानेपानी योजनाको समेत अनुगमन गर्नुभएको छ ।

चाईनावगर क्षेत्रका ८० घरधुरीमा एक घर एक खानेपानी, चार सार्वजनिक स्थानमा शुद्धिकरण गरिएको खानेपानी पुयाईएको छ भने मुसिकोट १४ का ६० घरधुरीमा एक घर एक धारा कार्यक्रममार्फत समुदाय लाभान्वित भएका छन् । 

यस क्रममा उहाँले उपभोक्ता र सरोकारवाला कार्यालयहरुसँग पनि अन्तरक्रिया गर्नुभएको छ । उहाँले विभिन्न योजनाहरुका उपभोक्ता समिति, स्थानीय जनप्रतिनिधिहरु, सानीभेरी गाउँपालिका, जिल्ला अस्पताल विकास समिति, खानेपानी, सिंचाई तथा उर्जा विकास कार्यालयमा छलफल गर्नुभएको हो । 

मन्त्री बुढाले निर्माणाधिन जिल्ला अस्पतालको निर्माणधिन भवनको निरीक्षण गर्नुका साथै जिल्ला अस्पतालबाट भईरहेका काम र सेवा प्रवाहको अवस्थाका बारेमा पनि जानकारी लिनुभएको छ । यसका साथै खानेपानी, सिंचाई तथा उर्जा विकास कार्यालयमार्फत भईरहेका काम कारबाहिको बारेमा समेत जानकारी लिनुभएको छ । 

स्थलगत अनुगमनमा खानेपानी, सिंचाई तथा उर्जा विकास कार्यालयका प्रमुख तारा केशर वाग्ले, रुकुमेली समाज विकास केन्द्रका संस्थापक अध्यक्ष नरबहादुर लम्साल, कार्यकारी निर्देशक नरेन्द्र ओली लगायत सरोकारवाला निकायका प्रतिनिधिहरुको सहभागिता रहेको थियो । सोमबार जाजरकोट जिल्लाका विभिन्न योजनाहरुको अनुगमन हुने मन्त्री बुढाको सचिवालयले जनाएको छ ।