विद्यार्थी राजनीति हुँदै अब प्रतिनिधिसभामा गोपाल शर्मा

कुनै समय एउटै पार्टी–संगठनमा रहेर सहकार्य गरेका गोपाल शर्मा र जनार्दन शर्माका बीचमा यसपल्टको निर्वाचनमा भने प्रतिस्पर्धा भयो । साबिकको माओवादीले विभिन्न दलसँग एकता गर्दै नेपाली कम्युनिस्ट पार्टी (नेकपा) बनेपछि गोपाल यही पार्टीमा रहे भने जनार्दन उक्त एकतामा नगई प्रगतिशील लोकतान्त्रिक पार्टी (प्रलोपा) गठन गर्नतर्फ लागे । यसपछि यी दुई पूर्व सहकर्मीको बाटो अलग–अलग भयो । 

अनि यसपल्टको निर्वाचनमा यी दुवै जना एकै निर्वाचन क्षेत्रमा तर, फरक–फरक पार्टीबाट चुनावी प्रतिस्पर्धामा उत्रिए । मतगणनाको सुरुवातीमा अग्रता जनार्दन शर्माकै भएपनि पछि गोपालले लगातार लिड गरिरहे । सुरुमा गोपाल र जनार्दनकै बिचमा प्रतिस्पर्धा देखियो पछि गोपालले कांग्रेसका उम्मेदवार राजु केसीसँग ४ हजार ९ सय ४८ मतान्तरले जित हात पारे । 

वि.सं. २०४६ सालतिर गोपाल शर्मा जम्मा १२ वर्षका थिए । देशमा भर्खरै प्रजातन्त्रको उदय भएको थियो । त्यही बेला उनको मनमा पनि एक प्रकारको हलचल पैदा भयो, परिवर्तनको लालित्य मन–मस्तिष्कसम्म पुग्यो । त्यही बेला तत्कालीन विद्यार्थी संगठन अनेरास्ववियुको कलम–तारा अंकित झन्डा उचालेर उनले आफ्नो राजनीतिक यात्राको आरम्भ गरे ।

रुकुमको चौरजहारीस्थित शीतल माध्यामिक विद्यालयमा अनेरास्ववियुको सह–इकाई कमिटीको सह–सचिवको जिम्मेवारी ग्रहण गर्दै उनले रातो झन्डामुनि परिवर्तनको कसम खाए । अनि सुरु भयो गोपाल शर्माबाट ‘कमरेड अनल’ बन्ने उनको यात्रा । तत्कालीन ‘जनयुद्ध’ताका राखिएको उनको सम्पर्क नाम हो ‘अनल’ अर्थात् ‘कमरेड अनल’ ।

रुकुम पश्चिमको चौरजहारी नगरपालिका वडा नं. ५ लाहरेसिमलमा आजभन्दा ४८ वर्षअघि जन्मिएका शर्माले २०४८ सालमा सोही विद्यालयमा अनेरास्ववियुको इकाई अध्यक्ष हुँदै २०५१ मा रुकुम जिल्ला कमिटी सदस्य, २०५३ मा जिल्ला अध्यक्ष र २०५४ मा केन्द्रीय सदस्य एवम् राप्ती अञ्चल इन्चार्जको जिम्मेवारी बहन गरे । यसका साथै उनी २२ वर्षको हुँदा २०५६ सालमा अखिल क्रान्तिकारीको केन्द्रीय उपाध्यक्ष एवम् तत्कालीन नेकपा माओवादीको रुकुम जिल्ला कमिटी सदस्य तथा एरिया इन्चार्जसमेत भए ।

देशमा ‘जनयुद्ध’को राँकोले तत्कालीन राज्यसत्ताको जग हल्लिँदै गरेका बेला, गाउँदेखी सहरसम्म परिवर्तनको नारा गुञ्जिरहेका बेला उनले आन्दोलनको भुङ्ग्रोभित्र आफूलाई स्पात बनाइरहे अनि प्राप्त सबै जिम्मेवारीहरू पूरा गर्दै अघि बढिरहे । यसै क्रममा २०६० सालमा विद्यार्थी राजनीति छोडेर शर्मा पूर्णकालीन भएर पार्टी राजनीतिमा होमिए । 

२०५६ मा नेकपा माओवादीको जिल्ला कमिटी सदस्य र एरिया इन्चार्ज, २०५७ मा विशेष उप–क्षेत्रीय ब्युरोको सदस्य र त्यसको केही समयपछि भेरी–कर्णाली क्षेत्रीय ब्युरोमा स्थानान्तण, २०५८ देखी २०६० सम्म भेरी–कर्णाली क्षेत्रीय ब्युरो अन्तरगत विशेष जिल्ला इन्चार्ज र गण्डक क्षेत्रको पनि जिम्मेवारी, २०६० देखि २०६२ सम्म भेरी–कर्णाली क्षेत्रीय ब्युरो अन्तरगत बाँके र बर्दिया जिल्लाको इन्चार्ज र २०६२ माघदेखि आधार इलाका विशेष ब्युरोमा स्थानान्तरण भई २०६४ सम्म रुकुम जिल्लाको सेक्रेटरी एवम् २०६४ सालको पहिलो संविधानसभा निर्वाचनमा निर्वाचन परिचालन समितिको प्रमुख भएर खटिएको उनको इतिहास छ । 

२०७३ मा उनी नेकपा (माओवादी केन्द्र)को पोलिटब्युरो सदस्य र २०७५ मा एकतापछि बनेको नेपाल कम्युनिस्ट पार्टी (नेकपा)कोसमेत रुकुम पश्चिमको जिल्ला अध्यक्ष भए । यही बेला उनलाई नेकपाको केन्द्रीय सदस्यको जिम्मेवारी पनि प्राप्त भएको थियो तर उनले आफू दोहोरो जिम्मेवारीमा नरहने भन्दै उक्त जिम्मेवारी अरू सहकर्मीका लागी सुम्पिए ।

२०७७ सालमा नेकपा विभाजित भई माओवादी केन्द्र साबिककै अवस्थामा पुनर्गठन भएपछि २०७८ सम्म नेकपा माओवादी केन्द्रको केन्द्रीय सदस्य तथा जिल्ला समन्वय समितिको संयोजक भए । अनि २०७९ देखि हालसम्म उनी पार्टीको केन्द्रीय सदस्यको जिम्मेवारीमा छन् ।

२०४६ को पेरीफेरीको परिवर्तनको झिल्को देखेका गोपाल शर्माले ‘जनयुद्ध’को रापताप भोगे । आरम्भमा विद्यार्थी नेता भएर शैक्षिक सुधारका मुद्दा उठाएका उनले सशस्त्र संघर्ष र जनआन्दोलनको उभारसँगै देश परिवर्तनको नारामा आवाज पुलन्द पारे । 

यसपछि शर्मा २०७४ सालमा सम्पन्न प्रदेशसभा सदस्य निर्वाचनबाट कर्णाली प्रदेश सांसदमा निर्वाचित भई २०७८ मा कर्णाली प्रदेश सरकारको अर्थमन्त्री भए । प्रदेश सभा र सरकारमा रहँदासम्म आफूले कर्णालीका अविकासका धर्साहरू मेटाउन आफ्नो ठाउँबाट सकेको कोसिस गरेको बताउँछन् । 

‘जिम्मेवारीमा हुँदासम्म मैले यसलाई भरपुर सदुपयोग गर्दै जनताको सेवा गर्ने एक महत्त्वपूर्ण अवसरका लिए,’ उनी भन्छन्, ‘मैले बाल्यकालदेखि हालसम्म जे–जति जिम्मेवारी प्राप्त गरेको छु त्यो सबै मेरो रहर, चाहना र रोजाई भन्दा पनि समयको माग थियो । अनि मेरो कार्यक्षमता र सक्षमताको परिणाम ।’

अहिलेसम्म आफूले कुनै पनि पद र जिम्मेवारी मागेर र दाबी गरेर नलिएको भन्दै उनले जे–जति कार्य–जिम्मेवारी बहन गरियो त्यो पार्टी–संगठनले विश्वास गरेर दिएको पनि बताए । 

करिब ३६ वर्ष लामो आफ्नो राजनीतिक यात्राका क्रममा यिनै गोपाल शर्मा अब प्रतिनिधिसभा सदस्यको जिम्मेवारीमा पुगेका छन् । रुकुम पश्चिम र सिंगो देशकै जनमनका माग र आवश्यकताको उपाय खोज्ने अनि नीति–निर्माण गर्ने काममा डटेर लाग्ने उनको प्रतिबद्धता छ । - इकान्तिपुरबाट