सरस्वती एडभान्सका विद्यार्थीहरु ऐतिहाँसिक तथा धार्मिक स्थलको अध्ययन, अवलोकनमा

रुकुम पश्चिमको चौरजहारी नगरपालिका वडा नम्वर १ मा रहेको सरस्वती एडभान्स इङ्लिस  मिडियम बोर्डिङ स्कुलका विद्यार्थीहरुले ऐतिहाँसिक तथा धार्मिक स्थलहरुको अध्ययन तथा अवलोकन गरेका छन् । 

स्कुलको कक्षा ५ र ८ मा अध्ययनरत विद्यार्थीहरुले आज शुक्रबारका दिन नगरपालिकाको वडा नम्वर ३ मा रहेको ऐतिहाँसिक देवल, विजयश्वरी मन्दिरको अवलोकन गरेका हुन् । यसका साथै उनीहरुले नगरपालिकाको प्रशासनिक कार्यालयको समेत अवलोकन गरेका छन् । 

स्कुलका प्रिन्सिपल गोपाल लामिछानेका अनुसार स्थानीय पाठ्यक्रममा आधारित रहेर अध्ययन अवलोकनको कार्यलाई प्रयोगात्मक रुपमा कार्यान्वयन गरिएको हो । बालबालिकाहरुको चौतर्फी ज्ञानको विकास गर्नका साथै अतिरिक्त क्रियाकलापलाई निरन्तरता दिने क्रममा स्थानीय स्तरका ऐतिहाँसिक तथा धार्मिक स्थलहरुको अवलोकन गराईएको उहाँले जनाउनुभयो ।

यस क्रममा बालबालिकाहरुले नगरपालिकाको कार्यालयमा पुगेर प्रमुख प्रशासकीय अधिकृत शेर प्रसाद ढकाल लगायतसँग स्थानीय सरकारको सेवा प्रवाहको प्रक्रिया तथा अवस्थाको बारेमा अन्तरक्रिया समेत गरेका छन् । 

अध्ययन तथा अवलोकन कार्यमा सहभागी विद्यार्थीहरुले स्थानीय पाठ्यक्रममा सिकेको ज्ञानलाई प्रत्यक्ष रुपमा देखेर तथा अवलोकन गरेर थप ज्ञान हाँसिल भएको प्रतिक्रिया दिएका छन् ।