मुसिकोटका जेष्ठ नागरिकलाई न्यानो कपडा वितरण

रुकुम पश्चिमको मुसिकोट नगरपालिका भित्रका जेष्ठ नागरिकहरुलाई न्यानो कपडा वितरण गरिएको छ । यहाँका १४ वटै वडाका ७७ वर्ष माथिका ५७५ जना जेष्ठ नागरिकहरुलाई न्यानो कपडा अन्तर्गत ब्लाङकेट वितरण गरिएको हो । 

नेपाल ख्रिष्टियन राहत सेवाको सहयोग तथा मुसिकोट नगरपालिकाको समन्वयमा सम्बन्धित वडा कार्यालयबाटै ब्लाङकेट वितरण गरिएको हो । राहत सेवा केन्द्रका कोषाध्यक्ष मुकुन्द कुमार शर्माका अनुसार जेष्ठ नागरिकहरुलाई चिसोबाट जोगिन सहज होस् भन्ने उद्धेश्यका साथ न्यानो कपडा उपलब्ध गारईएको हो । उहाँले नगरपालिकासँगको समन्वयमा ४७८ वटा र विभिन्न संघ सस्थामार्फत ९७ वटा ब्लाङकेट ५७५ जना जेष्ठ नागरिकलाई उपलब्ध गराईएको बताउनुभयो । 

नगरपालिकाका अनुसार वडा नम्वर १ का ५७ जना, २ का ३४ जना, ३ का १९ जना, ४ का ३५ जना, ५ का २७ जना, ६ का २६ जना र वडा नम्वर ७ का ४० जना जेष्ठ नागरिकहरुलाई न्यानो कपडा वितरण गरिएको हो । त्यसैगरी वडा नम्वर ८ का १६ जना ९ का २८ जना, १० का ३४ जना, ११ का ५५ जना, १२ का ३८ जना, १३ का ४६ जना र १४ का २३ जना जेष्ठ नागरिकहरुलाई सम्बन्धित वडा कार्यालयमार्फत ब्लाङकेट उपलब्ध गराईएको हो । 

मुसिकोट नगरपालिकाले नगरभरिका जेष्ठ नागरिकहरुलाई चिसोबाट जोगाउन न्यानो कपडा वितरण भएको जनाएको छ । चिसो बढीरहेको बेलामा जेष्ठ नागरिकहरुको स्वास्थ्य अवस्थालाई मध्यनजर गरेर कपडा वितरण भएको नगरपलिकाको भनाइ छ ।

मुसिकोट नगरपालिका वडा नम्वर १२ का वडा अध्यक्ष धिरण सिर्पालीले ७७ वर्ष माथिका जेष्ठ नागरिक सबैलाई पुग्ने गरी एक एक वटा न्यानो कपडा वडा कार्यालयबाट हस्तान्तरण गरिएको जानकारी दिनुभयो । उहाँका अनुसार सामाजिक सुरक्षा भत्ता पाउने सबै जेष्ठ नागरिकहरु यस सहयोगबाट प्रत्यक्ष लाभान्वित हुनुभएको छ ।

न्यानो कपडा वितरण कार्यक्रममा मुसिकोट नगरपालिकाका उपप्रमुख बिमल कुमार पुन, जेष्ठ नागरिक मञ्चका नगर अध्यक्ष लक्ष्मण कुमार शर्मा, सम्बन्धित वडाका वडा अध्यक्ष तथा जनप्रतिनिधिहरु लगायतको उपस्थिति रहेको थियो ।