चौरजहारीमा डिडिए रिपोर्टमाथि उजुरी नै परेन, चार हजार घर पुनर्निर्माणका लागि पहिचान

रुकुम पश्चिमको चौरजहारी नगरपालिकामा भूकम्प प्रभावितहरुको विस्तृत क्षति आकलन (डिडिए) प्रतिवेदन उपर कुनै पनि उजुरी परेको छैन ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणमार्फत भएको डिडिएको प्रतिवेदन उपर स्थानीय तहमा दावी बिरोध तथा उजुरी दर्ता गर्न सकिने गरी तोकिएको समय सिमाभित्र कुनैपनि उजुरी नपरेको चौरजहारी नगरपालिकाले जनाएको छ । 

नगरपालिकाका निमित्त प्रमुख प्रशासकीय अधिकृत शेरप्रसाद ढकालका अनुसार विस्तृत क्षति आकलन प्रतिवेदनअनुसार लाभग्राही बन्न अयोग्य भए दावीविरोध गर्न गरिएको सूचनाको म्याद भित्र कुनै पनि उजुरी नपरेको तर पुनर्निर्माणका लागि लाभग्राही कायम हुन आफू  योग्य भएकोले पुनःविस्तृत क्षति आँकलन गर्नुपर्ने पनि निवेदन दर्ता भएका छन् ।

उहाँका अनुसार दुई हजार ७२ जनाले पुनः क्षति आकलनको लागि निवेदन दर्ता गराएका छन् । बिहिबार नगर प्रमुख पुष्प वादीको अध्यक्षतामा बसेको स्थानीय तह विपद् व्यवस्थापन समितिको बैठकले ती निवेदन तथा गुनासाहरु  सम्बन्धित निकायमा लेखि पठाउने निर्णय गरेको ढकालले जानकारी दिनुभयो । 
 
बैठकमा यस अघि बैठकले गरेका निर्णयको समीक्षा गरिएको छ भने बाढी पहिरो र चट्याङले क्षति पुगेका ८ घर परिवारलाई राहत रकम प्रदान गर्ने निर्णय समेत गरेको छ ।

त्यसैगरी २०८० कार्तिक १७ गते जाजरकोट केन्द्रबिन्दु भएर गएको भूकम्पका कारण प्रभावित चार हजार २० परिवारको आवास  पुनर्निर्माणका लागि लाभग्राही पहिचान गरी स्वीकृतिका लागि जिल्ला विपद् व्यवस्थापन समिति समक्ष पठाउने निर्णय पनि बैठकले गरेको निमित्त प्रमखु प्रशासकीय अधिकृत ढकालले जानकारी दिनुभयो ।