एनपिएलमा लुम्बिनी लायन्समाथि कर्णाली याक्सको रवाफिलो जित

कर्णाली याक्सले नेपाल प्रिमियर लिग (एनपिएल) मा पहिलो जित निकालेको छ । कर्णालीका मार्क वाटले अविजित विस्फोटक शतकीय पालि खेलेपछि कर्णाली याक्सले जित निकालेको हाे । 

कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट स्टेडियममा शनिबार भएको खेलमा कर्णालीले लुम्बिनी लायन्समाथि नौ विकेटको रवाफिलो जित निकाल्यो ।  

जितका लागि लुम्बिनीले दिएको एक सय ५७ रनको लक्ष्य पछ्याएको कर्णालीले १२.२ ओभरमा एक विकेटको क्षतिमा एक सय ६१ रन जोड्दै लक्ष्य पूरा गरेको हो । 

कर्णालीका लागि मार्क वाटले ४४ बलमा ६ चौका र १२ छक्काको सहयोगमा एक सय १४ रन बनाउनुभयो । जारी मार्क वाटको यो जारी एनपिएलकै पहिलो शतक हो ।

यस्तै विलियम बसिस्टोले अविजित २९ र ओपनर प्रियांक प्रान्चालले १२ रन बनाउनुभयो । मार्क वार्ट प्लेयर अफ दिन म्याच हुनुभयो । बलिङमा लुम्बिनीका शेर मल्लले एक विकेट लिनुभयो । 

यसअघि टस हारेर पहिले ब्याटिङको निम्तो पाएको लुम्बिनीले निर्धारित २० ओभरमा आठ विकेटको क्षतिमा एक सय ५६ रन बनाएको थियो । 

लुम्बिनीका लागि कप्तान रोहित पौडेलले सर्वाधिक ४९ रन बनाउनुभयो । यस्तै रुबेन ट्रम्पलमानले अविजित २९, जोहानिस जोनाथन स्मितले २३ र  डी’आर्की शर्टले १९ रन बनाउनुभयो । अन्य अन्य ब्याट्सम्यानले दोहोरो अङ्कमा रन बनाउन सकेनन् ।

बलिङमा कर्णालीका नन्दन यादवले दुई विकेट लिनुभयो । यस्तै सोमपाल कामी, गुलशन झा, मार्क वाट, विपिन शर्मा र युवराज खत्रीले एक एक विकेट झार्नुभयो । 

दोस्रो खेलमा पहिलो जित निकालेको कर्णालीले दुई अङ्क बनाएको छ । कर्णाली पहिलो खेलमा चितवन राइनोजसँग चार विकेटले पराजित भएको थियो ।

यस्तै दुई खेल खेलेको लुम्बिनीले पनि पहिलो हार खेपेको छ । लुम्बिनीले यसअघि पहिलो खेलमा चितवन राइनोजलाई ६ विकेटले हराएको थियो ।