सानीभेरीको नेटाडाँडामा मन्दिरसहितको पर्यटकीयस्थल बनाउँदै युवाहरु 

रुकुम पश्चिमको सानीभेरी गाउँपालिका १ चाईनाबगरको नेटाडाँडामा मन्दिरसहितको पर्यटकिय स्थल निर्माण कार्य सुरु भएको छ ।स्थानीय युवाहरुले श्रमदानमार्फत मन्दिरसहितको पर्यटकियस्थल बनाउन सुरु गरेका हुन् । 

समाज निर्माणमा युवाको भूमिका भन्ने नारा व्यवहारमा उतार्दै श्रमदानको माध्यमबाट मन्दिरसहितको पर्यटकीयस्थल निर्माण कार्यलाई अगाडि बढाइरहेको युवाहरुले जनाएका छन् । निर्माण कार्यमा संलग्न सोनु खड्काले युवाहरुले नारा मात्र भन्दा पनि व्यवहारिक रुपमा उल्लेखनिय काम गर्न सक्छन् भन्ने गतिलो उदाहरणका रुपमा यस कामलाई लिन सकिने बताउनुभयो ।

उहाँले सामाजिक सञ्जालमा लेख्ने, टिप्पणी गर्ने र सुझाव दिने सकारात्मक कार्य गरिरहेको युवा जमातले जनहितका लागि श्रम गर्न कस्सिएको बताउनुभयो । यस कार्यमा हरेक वडाबासीले आफ्नो सामर्थ्य अनुसार श्रमदान र सहयोग गरेर यस अभियानलाई सफल बनाउन हातेमालो गर्न आवश्यक रहेको खड्काले उल्लेख गर्नुभयो । 

आफ्नो गाउँको विकास आफ्नै हात र आफ्नै मेहनतबाट गर्न सकिन्छ भन्ने विश्वास बोकेर उनीहरूले पवित्रस्थल निर्माणको अभियानलाई निरन्तरता दिइरहेका छन्। यस कार्यलाई सामाजिक एकता र साझा पहिचानको प्रतीकका रूपमा पनि लिईएको छ । 

उनीहरूले मन्दिर र आसपासको क्षेत्रलाई व्यवस्थित पर्यटकीय गन्तव्यका रूपमा विकास गरेपछि गाउँमा धार्मिक पर्यटन र आन्तरिक आवागमन बढ्ने अपेक्षा गरेका छन् । 

अहिले स्थानीय युवाहरूले आफैंले ढुंगा, बालुवा, सिमेन्ट जस्ता निर्माण सामाग्री बोक्नेदेखि मन्दिरको जग खन्ने, बाटो निर्माण र सरसफाइमा सक्रिय योगदान दिएका छन्। साथै सहयोग गर्न चाहने स्वेच्छिक व्यक्ति वा संस्थाहरूलाई श्रमदान तथा आर्थिक सहयोगका लागि आग्रह गरिएको छ।