चौरजहारी १ मा दोश्रो वडा कप हुँदै

रुकुम पश्चिमको चौरजहारी नगरपालिका १ मा दोश्रो चौरजहारी १ नम्वर वडा कप हुने भएको छ । 

असोज २७ गतेदेखि दोश्रो चौरजहारी वडा नम्वर १ कप अन्तर्गत खुला वडा स्तरिय पुरुष भलिबल तथा विविध कार्यक्रम हुने भएको हो । 
वडा कप प्रतियोगिताका संयोजक रुद्रबहादुर बिष्टका अनुसार भलिबल, ब्याडमिन्टन, घैटोफोर, रस्साकस्सी, सटफुट, स्लो बाईक रेस लगायतका प्रतियोगिता आयोजना गरिएको छ । 

भलिबल प्रतियोगिताको प्रथम पुरस्कार ८२ हजार, द्वितीय पुरस्कार ५० हजार  र तृतीय पुरस्कार ३० हजार नगदका साथमा ट्रफि, मेडल र प्रमाणपत्र व्यवस्थापन गरिएको संयोजक बिष्टले जानकारी दिनुभयो । भलिबल प्रतियोगिताको दर्ता शुल्क सात हजार पाँच सय राखिएको छ ।

त्यसैगरी खुला ब्याडमिन्टन प्रतियोगिताको प्रथम पुरस्कार दश हजार र द्वितीय पुरस्कार पाँच हजार नगद तथा साथमा ट्रफि, मेडल र प्रमाणपत्र राखिएको छ । यस प्रतियोगिताको दर्ता शुल्क एक हजार राखिएको छ भने चौरजहारी नगरपालिका भित्रका टिमले मात्र भाग लिन पाउनेछन् । 

घैटोफोर, रस्साकस्सी र सटफुट प्रतियोगिताको पुरस्कार दुई/दुई हजार र दर्ता शुल्क दुई/दुई सय राखिएको छ भने स्लो बाईक रेस प्रतियोगिताको विजेतालाई पाँच हजार पुरस्कारको व्यवस्था गरिएको छ । स्लो बाईक रेस प्रतियोगिताको दर्ता शुल्क पाँच सय राखिएको छ । 

खेलहरु नकआउट रहनेछन् भने खेलाडीहरुको लागि जर्सी अनिवार्य गरिएको छ । वडा कप प्रतियोगिताका संयोजक रुद्रबहादुर बिष्टले शुद्ध वडा स्तरिय रुपमा खेलाईने प्रतियोगितामा भाग लिनको लागि असोज २६ गते भित्र समहु दर्ता गराई सक्नुपर्ने जनाउनुभयो ।