सानीभेरीका करिब प्रन्ध सय बालबालिकालाई शैक्षिक सामाग्री वितरण

रुकुम पश्चिमको सानीभेरी गाउँपालिकाका भित्र रहेका सामुदायिक विद्यालयका विद्यार्थीहरुलाई शैक्षिक सामाग्री वितरण गरिएको छ । 

मुसिकोट नगरपालिका १ निवासी समाजसेवी तथा युवा व्यवसायी राजु केसीको सहयोग तथा व्यवस्थापनमा यहाँका एक हजार पाँच सय विद्यार्थीहरुलाई शैक्षिक सामाग्री वितरण गरिएको हो । 

नेपाली कांग्रेसका युवा नेता समेत रहनुभएका सहयोगी केसीले सोमबार र मङगलबार सानीभेरी गाउँपालिका भित्रका २४ वटा विद्यालयका बालबालिकाहरुलाई कापी, कलम, रिफिल लगायतका शैक्षिक सामाग्री उपलब्ध गराईएको जानकारी दिनुभयो । उहाँका अनुसार कक्षा ९ र १० मा अध्ययनरत सबै विद्यार्थी र कक्षा १ देखि ८ मा प्रतिकक्षा तीन जनाको दरले गरिब तथा जेहेन्दार विद्यार्थीहरुलाई उक्त सामाग्री वितरण गरिएको हो ।

सानीभेरीमा रहेका सात वटा माध्यमिक र १७ वटा आधारभूत विद्यालयका बालबालिकाहरुलाई सामाग्री दिईएको हो । सहज र सरल शिक्षा प्राप्तीमा शैक्षिक सामाग्री अभावले हुने कठिनाई हटाउन आफूले सक्दो सहयोग गरेको उहाँको भनाइ छ । 

सोमबार सानीभेरी गाउँपालिकाको जनप्रिय मावि हासिबाङ, राप्ती ज्ञानोदय मावि सिम्ली र बाल ज्योती मावि गिठाकोटमा फरक फरक कार्यक्रम गरेर ११ वटा विद्यालयका बालबालिकाहरलाई शैक्षिक सामाग्री वितरण गरिएको थियो । त्यसैगरी मङगलबार सुर्योदय मावि बेल्टापु, भेरी दोभान मावि चाईनाबगर, शीतल मावि पक्रैया र सानीभेरी मावि मेघामा कार्यक्रम गरेर १३ वटा विद्यालयलाई शैक्षिक सामाग्री वितरण गरिएको हो । 

सानीभेरी गाउँपालिका ३ का वडा अध्यक्ष जगदिश नकालले गाउँ गाउँमा पुगेर गरिब तथा जेहेन्दार तथा अन्य विद्यार्थीहरुलाई ठुलो संख्यामा शैक्षिक सामाग्री व्यवस्थापन गरेर हस्तान्तरण गर्नु युवा तथा सफल व्यवसायी केसीको उल्लेखनिय तथा उत्कृष्ट कार्य भएको बताउनुभयो । उहाँले यस प्रकारको उदाहरणीय कार्यले बालबालिकाहरु र समाजमा सकारात्मक सन्देश प्रवाह हुने जनाउनुभयो । 

केसीले यस अघि बाँफिकोट र त्रिवेणी गाउँपालिकामा रहेका सबै सामुदायिक विद्यालयमा शैक्षिक सामाग्री वितरण गरिसक्नु भएको छ भने जिल्लाको आठबिसकोट, चौरजहारी र मुसीकोट नगरपालिकामा पनि वितरण गर्ने जनाउनुभएको छ । शैक्षिक सामाग्री वितरण कार्यक्रममा जनप्रतिनिधिहरु, विद्यालय व्यवस्थापन समितिका पदाधिकारीहरु, शिक्षक र विद्यार्थीहरुको सहभागिता रहेको थियो ।