सहिद गणेश शाहका परिवारलाई ३१ वर्षसम्म न राहत, न त न्याय

तत्कालिन जनयुद्धको क्रममा साबिक रुकुममै प्रथम सहिद हुनुभएका रुकुम पश्चिमको चौरजहारी नगरपालिका ११ खोलागाँउका सहिद गणेश शाहको हत्या भएको ३१ वर्ष बितेको छ । हालसम्म पनि राज्यबाट राहत पाउन नसकेको मृतकका परिवारले ३१ वर्षसम्म न्याए नपाएको बताएका छन् । 

मंगलबार खोलागाउँमा भएको सहिद गणेश शाहको ३१ औं स्मृति दिवसको अवसरमा आयोजित कार्यक्रमका बिच स्वर्गीय शाहको श्रीमती तुला कुमारी शाहले न्यायको पर्खाईमै ३१ वर्ष बितेको बताउनुभयो । श्रीमान् मारिएपछि परिवारको बिचल्ली परेको बताउनुहुँदै उहाँले श्रीमान् मारेकाहरु जनयुद्धको नाममा फरार भएको, हालसम्म कारबाहि नभएको र राज्यबाट हालसम्म राहत समेत नपाएको गुनासो गर्नुभयो ।  

तत्कालिन खोलागाउँ गाविस अध्यक्ष तथा जिल्ला विकास समितिका सदस्य शाह कामको सिलसिलामा जिल्ला सदरमुकाम जाँदै गर्दा २०५१ साल भदौ १७ गते सानीभेरी गाउँपालिका ९ सिम्लीको सुलिहालेमा तत्कालिन माओवादीबाट हत्या भएको थियो ।

कार्यक्रममा नेपाली काँग्रेस रुकुम पश्चिमका सभापति प्रेम प्रकाश ओलीले माओवादीले जनयुद्ध सुरु अघि चलाएको सिस्ने जलजला (सिज) अभियानको क्रममा गणेश शाहको घाँटी रेटेर हत्या गरेको तर हालसम्म पनि न्याय नपाएको बताउनुभयो । फरक राजनीतिक आस्थाकै कारण शाहको हत्या भएको र राजनीतिक विभेदकै कारण शाहको परिवारले राहत समेत नपाएको उहाँको भनाइ छ । 

सरकार र बिद्रोही माओवादी बिच बिस्तृत शान्ती सम्झौता हुँदा २०५२ साल फाुगन १ गते यताका घटनालाई मात्रै द्वन्द्वकालिन घटना मान्ने भनेर उल्लेख गरिएपछि मृतक शाहको परिवारले राहत पाउनबाट बञ्चित भएको उहाँले बताउनुभयो । सभापति ओलीले राज्यले राजपत्रकै सहिदको सूचिमा गणेश शाहको नाम समावेश गरेको तर सहिदका परिवारलाई दिईनुपर्नै राहत रकम नदिएको उल्लेख गर्नुभयो । ३१ वर्षसम्म सहिद परिवार अन्यायमा बाँचिरहेको ओलीले बताउनुभयो । 

कार्यक्रममा नेपाली काँग्रेसका जिल्ला सदस्य तथा संगठन विभाग प्रमुख यदु कुमार आचार्यले मान्छे मारेर विचार नमर्ने बताउनुभयो ।

गणेश शाहको विचार र बाटो असल र अमर रहेको उल्लेख गर्नुहुँदै उहाँले हत्याको राजनीती अपराधिक मानसिकताको उपज भएको बताउनुभयो । सहिद शाहले अंगालेको प्रजातन्त्र र लोकतन्त्रको बाटोमा मुलुक हिडिरहेकोले उहाँ अमर रहेको आचार्यले जनाउनुभयो । 

चौरजहारी नगर समितिका सभापति प्रेम बहादुर ओलीले हत्या र हिंसाको बाटोले कसैको पनि भलो नहुने र विचार मार्न नसकिने बताउनुभयो ।

वैचारिक आस्थाकै आधारमा हत्या गरिएका गणेश शाहको परिवार तीन दशकसम्म न्यायको खोजीमा भौतारिनुपर्ने अवस्था आउनु भनेको कानूनी राज्य माथिको उपहास भएको उहाँको भनाई छ । शाहको परिवारलाई न्यायको माग गर्नुहुँदै नगर सभापति ओलीले निर्भिक, असल, इमान्दार नेतृत्व गुमाउँदा पार्टी संगठनलाई अपुरणिय क्षति भएको तर उहाँको विचार थप महान् बनेको बताउनुभयो । 

नेपाली काँग्रेस चौरजहारी नगरपालिका वडा नम्वर ११ का सभापति खिमबहादुर ओलीले हरेक वर्ष शाहको स्मृति दिवसका अवसरमा विभिन्न कार्यक्रम गरिरहेको जनाउनुभयो ।

३१ औ स्मृति दिवसको अवसरमा सहिद स्मृति नगर अस्पतालमा भर्ना भएका १८ जना बिरामी र उहाँका कुरुवा, स्वास्थ्यकर्मीहरुलाई फलफूल वितरण गरिएको, हाजिरीजवाफ र हिसाब दौड प्रतियोगिता सञ्चालन गरिएको र पत्रकार लक्ष्मण केसीलाई पुरस्कृत गरिएको वडा सभापति ओलीले जानकारी दिनुभयो । यसका साथै सहिद पत्नी तुला कुमारी शाहलाई दोसल्ला ओढाएर सम्मान समेत गरिएको थियो । 

पत्रकार लक्ष्मण केसीलाई गणेश शाह स्मृति पत्रकारिता पुरस्कार प्रदान