समाजसेवी केसीद्वारा सानीभेरीका ६ सय बढी बालबालिकालाई शैक्षिक सामाग्री वितरण 

रुकुम पश्चिमको सानीभेरी गाउँपालिकाका विभिन्न ११ वटा सामुदायिक विद्यालयमा अध्ययनरत विद्यार्थीहरुलाई शैक्षिक सामाग्री वितरण गरिएको छ । 

रुकुम पश्चिमको मुसिकोट नगरपालिका १ निवासी समाजसेवी तथा युवा व्यवसायी राजु केसीको सहयोग तथा व्यवस्थापनमा यहाँका ६२५ जना विद्यार्थीहरुलाई शैक्षिक सामाग्री वितरण गरिएको हो । 

सोमबार सानीभेरी गाउँपालिका भित्रका ११ वटा विद्यालयका बालबालिकाहरुलाई शैक्षिक सामाग्री वितरण गरिएको हो भने अन्य विद्यालयका बालबालिकाहरुलाई मंगलबारका दिन उपलब्ध गराईने बताईएको छ । नेपाली कांग्रेसका पूर्व महाधिवेशन प्रतिनिधि समेत रहनुभएका सफल व्यवसायी केसीले यस अघि बाँफिकोट र त्रिवेणी गाउँपालिकामा रहेका सबै सामुदायिक विद्यालयमा शैक्षिक सामाग्री वितरण गरिसक्नु भएको छ । 

सोमबार सानीभेरी गाउँपालिकाको जनप्रिय मावि हासिबाङ, राप्ती ज्ञानोदय मावि सिम्ली र बाल ज्योती मावि गिठाकोटमा फरक फरक कार्यक्रम गरेर ११ वटा विद्यालयका बालबालिकाहरलाई शैक्षिक सामाग्री वितरण गरिएको हो । 

कक्षा ९ र १० अध्ययनरत सबै विद्यार्थीहरु र अन्य कक्षाबाट गरिब तथा जेहेन्दार बिद्यार्थी छनौट गरेर कापी, कलक, रिफिल लगायतका शैक्षिक सामाग्री उपलब्ध गराईएको सहयोगी राजु केसीले जानकारी दिनुभयो । 

उहाँका अनुसार तीन स्थानमा पायक पर्ने विद्यालयको केन्द्र राखेर शैक्षिक सामाग्री वितरण गरिएको हो । जनप्रिय मावि हाँसिबाङका ७१ जना, राप्ती ज्ञानोदय मावि सिम्लीका २८० जना, आधारभूत विद्यालय शिव मगर राङजाका १५ जना, जनसहयोग आवि माथिल्लो आमडाँडाका ९ जना, बालकल्याण आवि फुक्रुका ९ जना र जनचाहना आविका २४ जना बालबालिकाहरुलाई कापी, कलम र रिफिल वितरण गरिएको हो । 

त्यसैगरी सरस्वती आविका १८ जना, कालिका आविका २४ जना, जनज्योती माविका ११२ जना, जनकल्याण आविका २७ जना र ज्ञानोदय आवि घर्तीगाउँका ३६ जना विद्यार्थीहरुलाई शैक्षिक सामाग्री उपलब्ध गराईएको हो । 

शैक्षिक सामाग्री वितरण कार्यक्रममा नेपाली कांग्रेसका सभापति प्रेम प्रकाश ओलीले गरिब तथा जेहेन्दार तथा अन्य विद्यार्थीहरुलाई ठुलो संख्यामा शैक्षिक सामाग्री व्यवस्थापन गरेर हस्तान्तरण गर्नु युवा तथा सफल व्यवसायी केसीको उल्लेखनिय तथा उत्कृष्ट कार्य भएको बताउनुभयो । 

सहज र सरल शिक्षा प्राप्तीमा शैक्षिक सामाग्री अभावले हुने कठिनाई हटाउन केसीले प्रदान गर्नुभएको सहयोग महत्वपूर्ण हुने उहाँको भनाई छ । यस प्रकारका सहयोगी कार्य ठुलो हृदय र मन हुनेले मात्र गर्न सक्ने बताउनुहुँदै उहाँले समाजसेवाको गतिलो उदाहरणका रुपमा गाउँ गाउँका बालबालिकालाई शैक्षिक सामाग्री वितरण गर्नुलाई लिन सकिने बताउनुभयो । 

शैक्षिक सामाग्री वितरण कार्यक्रममा नेपाली कांग्रेस रुकुम पश्चिमका सभापति प्रेम प्रकाश ओलीको प्रमुख आतिथ्यता रहेको थियो भने नेपाली कांग्रेसका कर्णाली प्रदेश सदस्य रिपबहादुर ओली, जिल्ला सचिव परमेश्वर भण्डारी, पार्टीका जिल्ला प्रवक्ता लालबहादुर ओली, सम्बन्धित विद्यालयको व्यवस्थापन समितिका पदाधिकारी, शिक्षक, कर्मचारी, अभिभावकहरु र विद्यार्थीहरुको उल्लेख्य सहभागिता रहेको थियो ।