रुकुम पश्चिम : नयाँ नागरिकता र राहदानी लिने घटे, राष्ट्रिय परिचय पत्र बनाउने बढे

जिल्ला प्रशासन कार्यालय रुकुम पश्चिमले नयाँ नागरिकता र राहदानी लिनेको सङख्यामा कमी आएको जनाएको छ । अघिल्लो आर्थिक वर्ष ०८०/०८१ भन्दा गत आर्थिक वर्ष ०८१/०८२ मा नयाँ नागरिकता र राहदानी लिनेको सङख्यामा कमी आएको हो । 

जिल्ला प्रशासनबाट सम्पादित कार्यहरुको जानकारी गराउनुहुँदै प्रमुख जिल्ला अधिकारी कुलबहादुर जिसीले गत आवमा पाँच हजार ६४८ नयाँ नागरिकता जारी गरिएको र अघिल्लो आवमा पाँच हजार ८०२ वटा नागरिकता वितरण गरिएको बताउनुभयो । पछिल्ला दुई वर्षको तुलना गर्दा नयाँ नागरिकता बनाउनेको सङख्यामा १५४ ले कमी आएको छ ।

प्रजिअ जिसीले राहदानी लिनेको सङख्यामा समेत कमी आएको जानकारी दिनुभयो । उहाँका अनुसार गत आव ०८१/०८२ मा दुई हजार ८९० वटा राहदानी वितरण गरिएको छ भने अघिल्लो आव ०८०/०८१ मा तीन हजार ३५८ वटा राहदानी वितरण गरिएको थियो । 

प्रशासन कार्यालयका अनुसार अघिल्लो आवमा तीन हजार ५०३ वटा नागरिकताको प्रतिलिपि जारी भएको थियो भने गत आवमा चार हजार ३६८ वटा प्रतिलिपि जारी गरिएको छ । 

प्रशासनले गत वर्ष एक वटाले नागरिकता त्याग गरेको र तीन जनाको नागरिकता रद्ध गरिएको जनाएको छ । नागरिकता र राहदानी बनाउनेको मुख्य कारण खोजिको विषय भएको प्रजिअ जिसीले उल्लेख गर्नुभयो । एउटा कारण बसाइसराई हुनसक्ने भएतापनि विभिन्न कारणहरु हुनसक्ने उहाँको भनाइ छ । राहदानी लिनेको सङख्या घट्नुको कारण वैदेशिक रोजगारीमा जानेको सङख्यामा कमी आएको अनुमान गरिएको छ । 

राष्ट्रिय परिचय पत्र दर्ता दोब्बर

जिल्लामा राष्ट्रिय परिचय पत्र दर्ताको अवस्था भने दोब्बरले बढेको छ । आव ०८०/०८१ मा छ हजार ३०४ जनाको राष्ट्रिय परिचय पत्र दर्ता गरिएको थियो भने आव ०८१/०८२ मा १२ हजार ८९७ जनाको विवरण दर्ता गरिएको छ । प्रशासनले छ हजार ५३४ वटा राष्ट्रिय परिचय पत्र वितरण गरेको छ । पछिल्लो समय सरकारी कामकाजमा राष्ट्रिय परिचय पत्र अनिवार्य बन्दै गएपछि राष्ट्रिय परिचय बनाउनेको सङख्यामा पनि वृद्धि भएको हो । 

प्रशासन कार्यालयले गत आव ०८१/०८२ मा एक करोड ६२ लाख १३ हजार ७५७ रुपियाँ राजश्व संकलन गरेको हो । न्यायिक दस्तुर, परीक्षा शुल्क, राहदानी शुल्क, हातहतियार इजाजतपत्र दस्तुर, प्रशासनिक दण्ड जरिवाना, जफत र अन्य विभिन्न शिर्षकबाट राजस्व संकलन भएको हो ।

कार्यालयले गत वर्ष पुँजिगतर्फ ४६ लाख १० हजार ४८६ र चालुतर्फ दुई करोड पाँच लाख ८७ हजार २८२ रुपियाँ खर्च  भएको जनाएको छ ।