कमरेड अनललाई पत्र

कमरेड अनल, हार्दिक अभिवादन तथा नमस्कार !

हामीबीचको चिनजान पनि करिब पच्चीस वर्ष पुरानो भयो होला । जनयुद्धको उत्कर्षसँगै संकटकालको अवस्था थियो । त्यतिबेला तपाईं आफ्नो पार्टीको बाँके–बर्दिया इञ्चार्ज हुनुहुन्थ्यो । सरल व्यवहार, शान्त स्वभावभित्र लुकेको तपाईंको नेतृत्व क्षमता त्यही समयमै प्रशंसा योग्य थियो ।

हरेक संकटको समाधान मुस्कुराउँदै खोज्ने, रमाइलो तरिकाले तर्क–वितर्क र बहस गर्ने, कतिपय विषयमा अरूको विचार र तर्कमा सहमति जनाउने, अनि कतिपय विषयमा नम्रतापूर्वक तर दृढतापूर्वक प्रतिवाद गर्ने तपाईंको क्षमता साँच्चै अनुकरणीय थियो । समयको प्रवाहलाई कस्ले रोक्न सक्थ्यो र ? समय फेरियो । करिब पच्चीस वर्षअघिको कुरा गर्दा यस क्षेत्रमा तपाईंलाई नजिक हुन चाहने अनुहारहरू सिमित थिए । त्यसैले हामीलाई पनि भेटघाट, छलफल र बहस गर्ने अवसर प्रायः मिल्थ्यो ।

तर आजको परिवेश फरक भइसकेको छ । तपाईंको विचार र संगठनको दायरा निकै फराकिलो भएको छ । हिजो तपाईंको विचार र सिद्धान्तप्रति घृणा गर्ने, असहयोग गर्ने, घात–प्रतिघात गर्ने अनुहारहरू पनि आज तपाईंको संगठनभित्र अटाएका, रमाएका र मोटाएका छन् । अहिले उनीहरुकै बोलबाला देखिन्छ तल देखि माथिसम्म । शायद आन्दोलनको उपलब्धी र यो व्यवस्थाको एउटा सुन्दर पक्ष पनि हुनसक्छ यो परिवेश ।

त्यो घेरा भित्र हामी अटाउन नसकेको वा त्यो घेरा नाघेर तपाई बाहिर आउन नसकेको वा नचाहेको भएर होला हामी अलि टाढिएका छौं, बिरानो जस्तो भएका छौं । त्यसैले पनि हामीबीच भौतिक र भावनात्मक सम्बन्धको दूरी बढ्दै गएको आभास हुन्छ। हालै प्रसारण भएको तपाईंको एउटा अन्तर्वार्ताले फेरि मन छोयो । त्यसले अतीतको सम्झना दिलायो र यो चिठी लेख्ने प्रेरणा मिल्यो ।

कमरेड, करिब पच्चीस वर्षअघि हामीले जुन–जुन विषयमा छलफल गरेका थियौं, आज पनि ती परिवेश र परिस्थितिहरू जस्ताको तस्तै छन् । त्यतिबेला हामीले भविष्यका सम्भावित परिणामको बारेमा विश्लेषण गरेका थियौं, र आजको अवस्थाले ती विश्लेषणको पुष्टि गरेको जस्तो लाग्छ । मलाई अझै सम्झना छ, एक दिन मैले क. रबिन (राम बहादुर थारु) लाई देखाउँदै भनेको थिएँ, "भोलीका दिनमा उहाँलाई कुनामा मिल्काएर निरिह पारिने, अनि कुनै धन वाला, बुद्धिवाला, चाकडी वालाले उपलब्धीको तर मार्ने दिन आउन सक्छ ।"

तर त्यस्तो अवस्था देख्न नपरोस । तपाईंको अन्तर्वार्ता सुन्दा, पच्चीस वर्षअघि सुनेका तपाईंका विचारहरू अझै जीवन्त र प्रखर देख्दा मनभित्रको सम्मान र श्रद्धा फेरि जाग्यो । अधुरा र अपूरा सपना पूरा गर्न तपाईँले देखाउनुभएको अटूट भावना, अथाह प्रयास र अविचलित लगनशीलताको म हृदयदेखि उच्च सम्मान गर्दछु ।

तपाईंको यो यात्राले केवल लक्ष्यतर्फको बाटो मात्र देखाएको छैन, यो यात्राले आशा, प्रेरणा र आत्मविश्वासको प्रकाश पनि फैलाएको छ । उपलब्धिभित्रका अधूरा र अपूरा खाडलहरू पुरेर पूर्णता हासिल गर्ने तपाईंको चाहना र प्रयास सफल होस् भन्ने हार्दिक शुभकामना व्यक्त गर्दछु।

शुभेच्छुक

रमेश थापा, ठाकुरद्वारा, बर्दिया

(नेकपा (माओवादी केन्द्र) का केन्द्रिय सदस्य गोपाल शर्मा 'अनल'लाई उहाँका शुभचिन्तकले लेखेको पत्र ।)