चौरजहारी अस्पतालबाट स्वास्थ्य बिमाको प्रथम सेवा बिन्दु हटाएपछि बिरामी मर्कामा

रुकुम पश्चिम, जाजरकोट र सल्यानको केन्द्रबिन्दुमा रहेको चौरजहारी अस्पतालबाट स्वास्थ्य बिमाको प्रथम सेवा बिन्दु हटाएपछि बिरामीहरु मर्कामा परेका छन् । 

नेपाल सरकार स्वास्थ्य बिमा बोर्डले यसअघि कायम गरेको स्वास्थ्य बिमाको प्रथम सेवा बिन्दु हटाएपछि यहाँका हजारौ बिमितहरु मारमा परेका हुन् । बोर्डले साउन १ गतेदेखि लागु हुनेगरी सरकारी अस्पताल बाहेकका अस्पतालको प्रथम सेवा बिन्दु हटाउने निर्णय गरेको थियो । चौरजहारी अस्पतालमा प्रथम सेवाबिन्दु बनाएर सेवा लिदै आएका ३८ हजार बिमितहरु यसको प्रत्यक्ष मारमा परेका छन् । 

आठबिसकोट नगरपालिका –३ का बिष्णु कुँवर योगीले चार दिन लगाएर आउँदा पनि बिमाको सुविधा नपाएको बताउनुभयो । उहाँका अनुसार बिमा सुविधा नपाएपछि टाढाबाट आएर महङगोमा उपचार गर्न बाध्य भएको जनाउनुभयो । सरकारले तोकेको सरकारी अस्पतालमा राम्रो उपचार सुविधा नरहेको र उपचार सुविधा रहेको अस्पतालबाट बिमा सेवा हटाएपछि मर्कामा परेको योगीको भनाइ छ । 

चौरजहारी नगरपालिका –७ निवासी शारीरिक अपाङगता हुनुभएका रामबहादुर बोहराले चौरजहारी अस्पतालमा प्रथम सेवा बिन्दु हुँदा सहज भएको र अब उपचार सुविधामा अन्यौलता आएको बताउनुभयो । उहाँले भन्नुभयो, ‘हामी जस्ता गरिब, अपाङगता भएकाहरुलाई दिईएको उपचार सुविधा हटाईयो, अब कहाँ जाने थाहा छैन, अन्यत्र गएर उपचार गर्ने पैसा छैन ।’ जनतालाई सुविधा दिन भन्दा नि दुःख दिनलाई बिमा बोर्डले यस्तो निर्णय गरेको उहाँको बुझाइ छ । 

सरकारी अस्पताल जान महङगो यातायात खर्च, गएपनि भरपर्दो सुविधा नहुँने, फेरि रिफर लिएर सुविधा सम्पन्न अस्पताल खोज्नुपर्ने बाध्यताको कारण यहाँका बिमितहरु मारमा परेका हुन् । चौरजहारी क्षेत्रको लागि नजिक मानिएको सरकारी अस्पताल प्राथमिक स्वास्थ्य केन्द्र कोटजहारी र सहिद स्मृति नगर अस्पताल खोलागाउँमा आवश्यक जनशक्ति र उपकरणको अभाव रहेको छ । चौरजहारी अस्पताल आएका अधिकांस बिरामीहरुले बिमा सुविधा नपाएपछि ऋण निकालेर भएपनि औषधि गरेर फर्कनुपर्ने बाध्यता रहेको जनाएका छन् । 

चौरजहारी अस्पतालले स्वास्थ्य बिमाको सुविधाबाट सेवा लिईरहेका सयौ बिरामीहरु अन्यौलमा परेको जनाएको छ । अस्पतालका प्रशासक डिलबहादुर गिरीका अनुसार दैनिक तीन सय देखि पाँच सय जनाले सेवा लिईरहेको यस अस्पतालमा ७० प्रतिशत बिरामीले स्वास्थ्य बिमाबाटै उपचार सुविधा लिने गरेका थिए ।

अस्पताल प्रशासक गिरीले सरकारकै प्रतिनिधिहरुले छनौट गरेको प्रथम सेवा बिन्दु अहिले हटाईदा रुकुमपश्चिम, सल्यान, जाजरकोट, रुकुम पूर्व, डोल्पा लगायतका बिरामी अन्यौलमा परेको बताउनुभयो । एक सय बेड क्षमताको यस सामुदायिक अस्पतालले सरकारले लिएको स्वास्थ्य नीति र योजनालाई सहयोग गर्ने दायित्व लिएकोले प्रथम सेवा बिन्दु नहटाउँदा जनतालाई गुणस्तरिय र प्रभावकारी दिन सकिने अस्पतालले जनाएको छ ।

२०७४ सालदेखि स्वास्थ्य बिमा कार्यक्रम लागु भएको यस अस्पतालमा न्यून आय भएका, विपन्न, दिर्घरोगी, अपाङगता भएका लगायतका बिरामीहरुले उपचार गराउने गरेका थिए ।