बाँफिकोटमा आफ्नै छोरामाथि खुकुरी प्रहार गर्ने बुवा पक्राउ 

रुकुम पश्चिममा खुकुरी प्रहारबाट एक जना घाईते भएका छन् । 

जिल्लाको बाँफिकोट गाउँपालिका ४ नेटा निवासी ३६ वर्षीया खगेन्द्र नेपाली माथि खुकुरी प्रहार भएको हो । जिल्ला प्रहरी कार्यालय रुकुम पश्चिमका प्रहरी निरीक्षक ऋषि पाठकका अनुसार गए राती खगेन्द्र माथि उहाँकै बुवा ७० वर्षीय मनबिर नेपालीबाट धारिलो हतियार (खुकुरी) प्रहार भएको हो । 

घरायसी विवादको कारण आफ्नै छोरा माथि खुकुरी प्रहार भएको बताईएको छ । 

खुकुरीले टाउकोमा प्रहार गरी घाईते बनाएको खबर प्राप्त हुनसाथ ईलाका प्रहरी कार्यालय बाँफिकोटबाट प्रहरी नायब निरीक्षक बिनोद जंग शाहको नेतृत्वमा प्रहरी टोली परिचालन भएको र घाईतेलाई तत्काल स्थानीय स्वास्थ्य चौकीमा लिएर उपचार गरिएको थियो । अहिले घाईतेको स्वास्थ्य अवस्था सामान्य रहेको छ ।  

खुकुरी प्रहार गर्ने बुवालाई प्रहरीले नियन्त्रणमा लिएको प्रहरी निरीक्षक पाठकले बताउनुभयो । मनबिरलाई बाँफिकोटबाट जिल्ला प्रहरी कार्यालय ल्याईदै गरेको बताईएको छ ।