अत्याधिक रक्तश्राव भएकी महिलाको हेलिकोप्टर मार्फत उद्धार

रुकुम पश्चिमकी एक महिलालाई नेपाली सेनाको हेलिकोप्टर मार्फत उद्धार गरिएको छ । बाँफिकोट गाउँपालिका २ पिपलकी ४० वर्षीया नन्दकला खड्का खत्रीलाई आज दिउँसो हेलिकोप्टर मार्फत उद्धार गरिएको हो । 

जिल्ला अस्पताल सल्लेका अनुसार गर्भवती अवस्थाकी नन्दकलालाई आज बिहान जिल्ला अस्पताल सल्ले ल्याईएको थियो । पेटमा करिव ९ हप्ताको गर्भ रहेको र भिडियो एक्सरे गर्दा पाठेघर भन्दा बाहिर नलीमा गर्भ बसेकाले अप्रेशन गरिएको थियो ।

नन्दकलाको शल्यक्रियापछि अत्याधिक रक्तस्राव भएको थियो । रक्तश्राव नरोकिएपछि उहाँलाई सुविधा सम्पन्न अस्पताल लैजान रिफर गरिएको अस्पताल व्यवस्थापक डा. महेश चौलागाईले जानकारी दिनुभयो । 

अप्रेसन पछि उच्च रक्तस्राव भएकी खड्कालाई थप आइसियुमा राखेर उपचार गर्नुपर्ने भएकाले प्रदेश अस्पताल सुर्खेत पठाइएको जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक हरि प्रसाद पुनले जानकारी दिनुभयो । उहाँका अनुुसार नन्दकलालाई राष्ट्रपति उत्थान कार्यक्रम अन्तर्गत नेपाली सेनाको नाईनए ०६१ हेलिकप्टरबाट सुर्खेत पठाइएको छ ।