सानीभेरीका ९३४ जना भूकम्प प्रभावित र विपन्न बालबालिकालाई सहयोग

रुकुम पश्चिमको सानीभेरी गाँउपालिकाले भूकम्प प्रभावित तथा विपन्न अवस्थाका बालबालिकाहरुलाई आर्थिक सहायता प्रदान गरेको छ ।  

गाउँपालिकाका बाल अधिकार अधिकृत मानविर ओलीका अनुसार गाउँपालिकाले विभिन्न साझेदार निकायसँगको समन्वयमा ५३ लाख ५६ हजार ३१० रुपियाँ आर्थिक सहायता गरिएको छ । उहाँले ९३४ जना भूकम्प प्रभावित, विपन्न, अनाथ बालबालिकालाई उक्त सहयोग गरेको जानकारी दिनुभयो । 

बालअधिकार अधिकृत ओलीले २०८० कात्तिक १७ गते जाजरकोट केन्द्रबिन्दु भएर गएको भूकम्पपछि यहाँका ४८९ जना बालबालिकालाई नगद सहयोग गरिएको बताउनुभयो । भूकम्प प्रभावित बालबालिका मध्य ३६१ जनालाई जनही चार हजार र १२८ जनालाई जनही दश हजारका दरले २७ लाख २४ हजार रुपियाँ आर्थिक सहायता प्रदान गरिएको हो । त्यसैगरी छ जना अनाथ बालबालिकाहरुलाई दुई हजारका दरले गाउँपालिकाले मासिक भत्ता उपलब्ध गराउँदै आएको छ ।  

गाउँपालिकाले आपतकालिन बाल उद्धार कोषबाट दश जनालाई ८४ हजार आर्थिक सहायता गरेको छ । उक्र रकम बालबालिको उपचारको लागि सहायता गरिएको हो । गणतन्त्र दिवसको अवसरमा २९ जना बालबालिकालाई शैक्षिक सहायता अन्तर्गत चार हजार ३१० रुपियाँ बराबरको शैक्षिक सामाग्री पनि सहयोग भएको छ ।

विपन्न लक्षित छात्रबृत्ति कार्यक्रम अन्तर्गत कक्षा ६ देखि १२ सम्मका चार सय जना बालबालिकालाई छात्रवृत्ति प्रदान गर्दै आईरहेको प्रतिवर्ष छ हजारका दरले २४ लाख रुपियाँ प्रदान गर्दै आईरहेको गाउँपालिकाले जनाएको छ । 

गाउँपालिकाका प्रमुख प्रशासकिय अधिकृत दिपक बुढाथोकीले भूकम्प प्रभावित बालबालिकाहरुलाई गरिएको सहयोगले उनीहरुलाई राहत तथा विद्यालय सिकाइमा ठुलो सहयोग भएको बताउनुभयो । यसका साथै अन्य आर्थिक तथा शैक्षिक सहयोगबाट समेत बालबालिकाको उपचार तथा विद्यालय निरन्तरमा मदत पुगेको छ । युनिसेफको सोसेक नेपाल, आवाज संस्था लगायतले भूकम्प प्रभावित बालबालिकालाई सहयोग गरेका हुन् ।

गाउँपालिका आफैले बालबालिकाको उपचार तथा शैक्षिक सामाग्री व्यवस्थापनमा सहयोग गरेको हो । सहायता रकम बालबालिकाको संरक्षकको खातामा जम्मा गरिएको हो भने शैक्षिक सामाग्रीहरु सम्बन्धित विद्यार्थीहरुलाई उपलब्ध गराईएको हो । सानीभेरी गाउँपालिकामा बालशिक्षा देखि कक्षा १२ सम्म अध्ययन हुने ४५ वटा विद्यालय रहेका छन् । यी विद्यालयहरुमा सात हजार ९७९ जना बालबालिका अध्ययनरत छन् ।