नलगाडमा १४ खानेपानी आयोजना र एक हजार शौचालय निर्माण

भूकम्पले घरसँगै खानेपानी र शौचालयमा क्षति गरेपछि समस्यामा रहेका जाजरकोटको नलगाड नगरवासीको घरघरमा खानेपानी र शौचालय सुविधा पुगेको छ । नगरपालिकाको वडा नम्वर १, २, ३, ६, ७, ८, ११ र १२ मा १४ वटा खानेपानी आयोजना र एक हजार १७ वटा शौचालय निर्माण गरिएको हो । 

भूकम्पपछि विभिन्न निकायबाट राहत र अस्थायी आवास निर्माणमा सहयोग भएतापनि खानेपानी र सरसफाईको क्षेत्रमा समस्या देखिएको थियो । विपद् प्रभावित समुदाय र विद्यालयमा थप जोखिम हुन नदिन खानेपानी, सरसफाई र स्वच्छता सम्बन्धि कार्यक्रम सञ्चालन गरेर प्रभावितहरुलाई सेवा प्रदान गरिएको हो ।

बेलायत सरकारको सहयोगमा सञ्चालित एकिकृत भूकम्प पुनर्लाभ कार्ययोजना अन्तर्गत युनिसेफ र सोसेक नेपालको प्राविधिक सहयोगमा नलगाड नगरपालिकाको आठ वटा वडामा सात हजार ६९० लाभग्राहीको घरमा खानेपानीसहितको धारा निर्माण गरिएको हो । 

सोसेक नेपालका सामाजिक व्यवहार परिवर्तन तथा तालिम अधिकृत सृष्टि बाँठा मगरका अनुसार भूकम्प प्रभावितका घरघरमा खानेपानीसहितको धारा र शौचालय निर्माण गरिएको छ । उहाँले एक हजार वटा शौचालयबाट पाँच हजार एक सय भूकम्प प्रभावितहरु र १७ वटा अपाङगतामैत्री शौचालयबाट २० जना अपाङगता भएका व्यक्तिहरु लाभान्वित भएको बताउनुभयो ।

समुदायसँगै यहाँका नौ वटा विभिन्न विद्यालयमा बालमैत्री धारा र शौचालय निर्माण गरिएको छ । विद्यालयमा स्वच्छता सुविधासहितको पानी आपूर्ती प्रणाली जडान गरिएको छ भने वास प्रवद्र्धनका गतिविधिहरु समेत गरिएको छ । यसबाट दुई हजार ४७ जना विद्यार्थीहरु लाभान्वित भएका छन् ।

वडा नम्वर १ ठुलाबगरका धर्मराज पुनले गाउँमा लक्ष्मीपाखा ठुलाबगर खानेपानी तथा सरसफाई आयोजना सम्पन्न भएर टोलका ३९ वटै घरमा खानेपानीसहितको धारा र भाँडा राख्ने स्थान, २८ वटा शौचालय निर्माण तथा नौ वटा मर्मत र दुई वटा अपाङगतामैत्री शौचालय निर्माण भएको बताउनुभयो ।

उहाँका अनुसार यसै टोलको लक्ष्मीपाखा प्राविमा खानेपानीसहितको बालमैत्री धारा र हात धुने स्थान बनाईएको छ । यसबाट समुदाय र विद्यालयस्तरमा प्रत्यक्ष सहयोग पुगेको छ । यस अघि गाउँमा खानेपानीका धारा थिएनन् । यहाँका स्थानीयले भेरीनदि र आधाघण्टा टाढाको मुहानबाट पानी बोकेर उपयोग गर्ने गर्दथे । 

सोहि वडाको कलपतका जनक नेपालीले टोलका १३८ वटा घरमा खानेपानी र धारा उपलब्ध गराईएको जानकारी दिनुभयो । यसबाट ७२१ जना लाभान्वित भएका छन् भने १२५ घरमा नयाँ र एक वटा अपाङगतामैत्री शौचालय बनाईएको छ । गाउँभन्दा तीन किलोमिटर टाढाको भेरीखोलाबाट एक ईन्टेक र दुई पानी ट्याङकी निर्माण गरेर घरघरमा खानेपानीको सुविधा पु¥याईएको नेपालीले उल्लेख गर्नुभयो । 

कल्पत टोलमा रहेको शिवशंकर आधारभूत विद्यालयमा खानेपानी र सरसफाईका लागि हातधुने स्थान बनाईएको छ । यस कार्यक्रम अन्तर्गत २० जना स्थानीय स्रोत व्यक्तिहरु परिचालन गरेर खानेपानी आपूर्ति योजना, सामुदायिक शौचालय र सामुदायिक खानेपानी, सरसरफाई तथा स्वच्छता प्रवद्र्धनका कार्य गरिएको छ । घरघरमै खानेपानीको धारा र शौचालय बनेपछि यहाँका भूकम्पपीडितहरु खुसी भएका छन् ।