नबिल बैंकद्वारा भूकम्प प्रभावितलाई अस्थायी टहरासँगै न्यानो कपडा 

जाजरकोट केन्द्रबिन्दु बनाएर २०८० कात्तिक १७ गते गएको भूकम्पबाट प्रभावित परिवारलाई गत वर्ष अस्थायी आवास (टहरा) निर्माणमा सहयोग गरेको नबिल बैंकले यस वर्ष न्यानो कपडा वितरण गरेको छ । 

नबिल बैंकले रुकुम पश्चिमको चौरजहारी नगरपालिका –१ का ४९ र जाजरकोटको नलगाड नगरपालिका –१ का ४७ गरेर जम्मा ९६ भूकम्प प्रभावित परिवारलाई न्यानो कम्बल उपलब्ध गराएको हो । अघिल्लो हिउँदमा अस्थायी आवास (टहरा) निर्माणमा सहयोग गरेको बैंकले यस वर्षको हिँउदमा ब्लाङकेट वितरण गरेको हो । 

नबिल बैंकका प्रतिनिधिहरुको उपस्थितिमा दुवै जिल्लाका सम्बन्धित वडा कार्यालयमा गएर न्यानो कपडा वितरण गरिएको हो । गत वर्ष अस्थायी आवास निर्माणमा सहयोग गरिएका लाभग्राहीहरुलाई नै वडा अध्यक्षको रोहबरमा न्यानो कपडा वितरण गरिएको हो । 

बैंकका संस्थागत सामाजिक उत्तरदायित्व प्रमुख प्रेमुका राईले दोश्रो हिउँद पनि अस्थायी टहरामा बिताउन बाध्य भूकम्प प्रभावित परिवारलाई चिसोबाट जोगाउन यस पटक न्यानो कम्बल उपलब्ध गराईएको बताउनुभयो । सानो सहयोगले पनि चिसोबाट जोगिन ठुलो मदत पुग्ने विश्वासका साथ उक्त सहयोग गरिएको राईले उल्लेख गर्नुभयो । 

न्यानो कपडा वितरण कार्यक्रममा नबिल बैक मुसिकोट शाखाका प्रबन्धक मीन राज अधिकारीले अघिल्लो हिउँदमा घरबासको समस्यामा परेको बेला अस्थायी टहरा बनाउन तत्कालै सहयोग गरिएको स्मरण गर्नुभयो । बर्ष दिनसम्म पनि टहरामै बस्न बाध्य पीडितहरुको अवस्थालाई मध्यनजर गरेर न्यानो कपडा उपलब्ध गराईएको अधिकारीले जनाउनुभयो । 

चौरजहारी नगरपालिका वडा नम्वर १ का वडा अध्यक्ष ईन्द्रे गिरीले अस्थायी टहरा बनाउन सरकारको योजना नभएको बेला सुरुमै नबिल बैंकले आफ्नो वडामा ४९ अस्थायी टहरा निर्माण गरिदिएको बताउनुभयो । यस वर्ष पनि प्रभावित परिवारलाई न्यानो कपडा दिएर पीडित परिवारलाई थप राहत दिएको उहाँले जनाउनुभयो । प्रभावित नागरिकलाई चिसोबाट जोगाउन बैंकले गरेको सहयोग अमूल्य रहेको उहाँको भनाई छ । 

नबिल बैंकले गत वर्ष चौरजहारी नगरपालिका –१ मा ४९ वटा र जाजरकोटको नलगाड नगरपालिका –१ मा ४७ वटा अस्थायी आवास निर्माणमा सहयोग गरेको थियो । बैंकको यस कार्यपछि मात्रै सरकारले अस्थायी टहरा बनाउने योजना ल्याएको थियो ।